Menu

ᓴᑐᕐᕖᑦ ᐃᓚᒌᓂ ᐱᒋᐊᖃᑦᑕᕐᓂᒥᒃ ᓄᕐᖃᑎᑦᓯᒋᐊᕈᑎᖏᑦ

ᐃᕐᓯᓇᕿᓂᖅ ᐱᒋᐊᖃᑦᑖᕆᔭᐅᓂᖅ

ᓴᑐᕐᕖᑦ ᐃᓚᒌᓂ ᐱᒋᐊᖃᑦᑕᕐᓂᒥᒃ ᓄᕐᖃᑎᑦᓯᒋᐊᕈᑎᖏᑦ

ᐱᒋᐊᖃᑦᑖᖃᕐᓂᖅ ᓄᕐᖃᓕ

ᐊᐅᒍᓯᑎ 1-ᒥᑦ 4-ᒧᑦ 2005-ᒥ, ᐳᕕᕐᓂᑐᒥ ᒪᙯᕝᕕᒦᓚᐅᕐᓯᒪᔪᑦ ᓄᓇᕕᒻᒥ ᐊᑐᓂᑦ ᓄᓇᓖᑦ ᐊᑕᐅᓯᕐᒥᒃ ᑭᒡᒐᑐᕐᑎᖃᕐᑎᓗᒋᑦ. ᑖᒃᑯᐊ ᐊᕐᓀᑦ ᑲᔪᓯᑎᑦᓯᓚᐅᕐᓯᒪᔪᑦ ᓄᕐᖃᑎᑦᓯᒋᐊᕈᑎᒥᒃ ᐱᓇᓱᐊᕈᑦᔨᐅᑎᐅᓗᓂ.

ᐊᑯᓂᐅᓗᐊᕐᑐᖅ ᑕᑯᓐᓇᓯᒪᓕᕋᑦᑕ ᐱᒋᐊᖃᑦᑕᓂᕐᒥᒃ ᐱᕙᓪᓕᐊᑐᐃᓐᓇᑎᓪᓗᒍ ᐊᒻᒪᓗ ᖃᓄᐃᓕᖕᖓᑕᐅᓯᒪᓕᕐᓱᑕ, ᕿᑐᕐᖓᕗᓪᓗ, ᐊᒻᒪᓗ ᐃᓅᖃᑎᒌᑦ ᐃᓘᓐᓈᒍᑦ.

ᑕᑯᓐᓇᑐᐃᓐᓇᖃᔭᑦᔭᒍᓐᓀᑐᒍᑦ ᓴᓂᕌᓃᑐᐃᓐᓇᓗᑕ ᐱᒋᐊᖃᑦᑕᑐᐃᑦ ᑲᔪᓯᑐᐃᓐᓇᑎᓗᒋᑦ ᐃᓄᖁᑎᑦᑎᓂ ᑕᑯᑦᓴᐅᕙᓪᓕᐊᑐᐃᓐᓇᓱᓂ. ᐱᒋᐊᖃᑦᑕᓂᕐᒥᒃ ᐃᕐᓯᓇᕐᕕᖃᕐᓂᒥᒃ ᓂᐯᑦᑑᒍᑎᖃᕈᒣᕐᑐᒍᑦ!

ᓄᓇᕕᒃ ᓯᕗᓂᑦᓴᖃᕐᒪᑦ ᕿᑐᕐᖓᑎᓂᒃ. ᐃᓕᔨᓪᓚᕆᒍᒪᔪᒍᑦ ᕿᑐᕐᖓᑕ ᐱᔪᓐᓇᐅᑎᓪᓚᕆᖓᓂᒃ ᐱᕈᕐᐸᓕᐊᒋᐊᖃᕐᓱᑎᒃ ᓄᓪᓚᖓᓐᓇᑐᒥ ᐊᒻᒪᓗ ᐊᑦᑕᓇᕐᑐᑕᖃᖕᖏᑐᒥ, ᐊᒻᒪᓗ ᑌᒣᓪᓗᑕ ᑭᓯᐊᓂ ᐱᒋᐊᖃᑦᑕᓂᐅᑉ ᐱᐅᓯᕆᔭᐅᑐᐃᓐᓇᓕᕐᓂᖓᓂᒃ ᓄᕐᖃᑎᑦᓯᒍᓐᓇᓚᖓᑦᓱᑕ.

ᐅᕙᒍᑦ, ᐃᓅᔪᒍᑦ ᐊᕐᓇᐅᓱᑕ ᓄᓇᕕᒻᒥᐅᒍᔪᒍᑦ, ᑎᓕᐅᕆᒍᑎᖃᓪᓚᕆᑦᑐᒍᑦ ᐊᕐᓀᑦ ᐊᒻᒪᓗ ᑲᒃᑲᓛᑦ ᐱᒋᐊᖃᑦᑖᒍᒍᓐᓀᕆᐊᖃᓕᕐᓂᖏᓐᓂᒃ. ᑲᒃᑲᓛᑦ ᐃᑦᓯᒎᕐᓂᒧᑦ ᑲᒪᒃᑭᓗᑦᑕᐅᕙᓐᓂᖏᑦ ᑲᒪᒋᔭᐅᖕᖏᑑᒋᐊᖃᕈᓐᓀᑐᖅ ᐊᒻᒪᓗ ᑌᒣᓘᕐᑕᐅᕙᒋᐊᖃᕈᓐᓀᓱᑎᒃ. ᐃᓘᓐᓇᖏᑦ ᐃᕐᓯᓇᕿᓃᑦ ᐱᒋᐊᖃᑦᑕᓃᑦ ᐱᓗᑲᕝᕕᖃᕐᓃᑦ, ᑎᒥᒍᑦ ᐅᕝᕙᓘᓐᓃᑦ ᐃᓱᒪᒃᑯᑦ, ᐊᕐᓇᓂᒃ ᐊᒻᒪᓗ ᑲᒃᑲᓛᓂᒃ ᑲᔪᓯᑐᐃᓐᓇᑐᑦᓴᐅᒍᓐᓀᑐᑦ.

ᑲᔪᓯᑎᑦᓯᖏᒃᑯᑕ ᐱᒋᐊᖃᑦᑕᓂᕐᒥᒃ ᓄᕐᖃᑎᑦᓯᒐᓱᐊᕐᓂᒥᒃ, ᐅᕙᒍᑦ ᐊᒻᒪᓗ ᕿᑐᕐᖓᑕ ᐃᑭᖏᑦ ᓄᐃᑕᖏᓐᓇᓚᖓᔪᑦ ᐊᓯᐅᔪᐃᑦᑐᖑᕐᓗᑎᒃ, ᖃᓄᐃᓕᒋᐊᕈᑎᖃᖕᖏᓂᖅ ᕿᑐᕐᖓᕇᓕᒫᓄᑦ ᐁᑦᑑᐱᔭᕐᑕᐅᓯᒪᐅᑕᐅᓲᒍᒻᒪᑦ ᐱᐅᓯᑐᐃᓐᓇᐅᔪᕆᔭᐅᓯᑦᓱᓂ.

ᐃᕐᓯᓇᕐᑐᖅ ᐱᒋᐊᖃᑦᑕᑎ ᐃᓱᒪᒋᔪᓐᓀᑕᐅᒍᓂ, ᐃᓱᒪᒋᔪᓐᓀᕕᖃᕐᓂᖅ ᑐᑭᓯᓇᕐᑎᓯᐅᑎᐅᒋᐊᖃᖕᖏᑐᖅ ᐱᒋᐊᖃᑦᑕᑎᒥᒃ ᖃᓄᐃᒋᔭᐅᖕᖏᑑᔪᕆᓚᕿᐅᑕᐅᓗᓂ.

ᐊᖓᔪᕐᖄᑦ ᐊᐅᓚᑦᔦᒍᑎᖃᕆᐊᓖᑦ ᐱᒋᐊᖃᑦᑕᓂᕐᒥᒃ ᓄᕐᖃᑎᑦᓯᒋᐊᕐᓂᖃᕐᓗᑎᒃ ᐊᒻᒪᓗ ᐱᒋᐊᖃᑦᑖᖃᕋᓗᐊᕋᒥᒃ ᐊᑭᓃᑎᑕᐅᒋᐊᕐᐸᖏᓐᓃᑦ ᑲᔪᓯᐅᒐᑐᐃᓐᓇᑎᑕᐅᒋᐊᖃᕈᓐᓀᖁᑦ ᐱᒻᒪᕆᑎᒍᑦ ᐊᑭᓃᑎᑕᐅᕙᒋᐊᖃᕐᒪᑕ.

ᓄᓇᕕᒻᒥᑦ ᐊᕐᓀᑦ ᐱᔪᒪᓪᓚᕆᓐᓂᒥᓂᒃ ᑐᓴᕐᑕᐅᑎᑦᓯᕗᑦ ᐃᓅᖃᑎᒌᓂ ᓈᒻᒪᑐᓂᒃ ᐋᕐᖀᒍᑦᔭᐅᕙᒋᐊᖃᕋᒥᒃ ᓄᓇᓕᒥᓂ.

ᑎᒥᖁᑎᕗᑦ – ᓄᓇᕕᒻᒥ ᓄᓇᓕᓐᓂ ᐊᒻᒪᓗ ᓄᓇᓕᓕᒫᓂ ᐊᖓᔪᕐᖄᑦ ᐊᒻᒪᓗ ᑲᕙᒪᑐᖃᒃᑯᑦ ᐳᔮᕓᓐᓯᐅᓗ ᑲᕙᒪᖏᒃ – ᑲᒪᒋᔭᖃᕆᐊᖃᓕᕐᑑᒃ ᐱᒋᐊᖃᑦᑕᓂᐅᑉ ᐃᕐᓯᓇᕿᓂᐅᑉ ᐃᕐᐸᓯᒪᓂᖓᓂᒃ.

ᐃᓘᓐᓇᑎᒃ ᓄᓇᕕᒻᒥᐅᑦ ᑐᖕᖓᓱᑦᑎᑕᐅᕗᑦ ᑖᑦᓱᒥᖓ ᓄᕐᖃᑎᑦᓯᒋᐊᕈᑎᒥᒃ ᐃᓱᒪᑦᓴᓯᐅᕈᑎᖃᕈᓐᓇᓱᑎᒃ, ᐊᖏᕐᓗᒍ ᐊᒻᒪᓗ ᖃᓄᐃᓕᒋᐊᕈᑎᒋᓗᒍ ᐃᕐᓯᓇᕐᓂᖅ ᐱᒋᐊᖃᑦᑕᓂᖅ ᖃᓄᐃᓕᖕᙰᓯᒪᔪᖅ ᓄᓇᓕᑦᑎᓂᒃ, ᐆᒻᒪᑎᕗᑦ, ᑕᕐᓂᕗᑦ ᐊᒻᒪᓗ ᐃᓅᓯᕗᑦ ᑕᑯᓐᓇᓂᕐᓴᐅᖁᓚᖓᒐᑦᑎᒋᑦ ᓄᐃᑦᓯᒋᐊᕐᓂᒥᒃ ᐱᐅᓂᕐᓴᒥᒃ ᐃᓅᓯᕐᑖᕋᓱᐊᕐᓂᖏᓐᓂᒃ ᐃᓘᓐᓇᖏᑦᑕ ᓄᓇᕕᒻᒥᐅᑦ.

ᑖᓐᓇ ᓄᕐᖃᑎᑦᓯᒋᐊᕐᓂᖅ ᐱᒋᐊᖃᑦᑖᖃᕐᓂᒥᒃ ᐊᖏᕈᒃ, ᖃᕆᑕᐅᔭᒃᑰᕕᑦ ᑕᑯᔭᐅᑎᒍᒃ, ᐊᓯᓐᓅᕕᑦ ᖃᐅᔨᔭᐅᑎᒍᒃ!

Pin It on Pinterest

ᓴᑐᕐᕖᑦ ᐃᓚᒌᓂ ᐱᒋᐊᖃᑦᑕᕐᓂᒥᒃ ᓄᕐᖃᑎᑦᓯᒋᐊᕈᑎᖏᑦ