Menu

ᑕᑯᓐᓇᑕᐅᓂᖏᑦ ᓄᓇᕕᒻᒥ ᐸᕐᓀᒍᑎᐅᑉ ᐊᒻᒪᓗ ᐸᕐᓇᓯᒪᐅᑎᐅᑉ

Politics

ᑕᑯᓐᓇᑕᐅᓂᖏᑦ ᓄᓇᕕᒻᒥ ᐸᕐᓀᒍᑎᐅᑉ ᐊᒻᒪᓗ ᐸᕐᓇᓯᒪᐅᑎᐅᑉ

ᑐᓴᕐᑎᓯᕐᖄᕈᑏᑦ

ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᐱᒋᐊᓪᓚᕆᑦᓯᒪᔪᖅ ᐃᓄᐃᑦ ᐊᒻᒪᓗ ᐃᓄᑐᐃᓐᓇᐅᖏᑦᑐᑦ ᐊᕐᓀᑦ ᐃᓘᓐᓀᓂᑦ ᓄᓇᓕᓐᓂ ᓄᓇᕕᒻᒥ ᐱᓯᒪᑦᓱᑎᒃ ᐊᒻᒪᓗ ᖃᓪᓗᓈᑦ ᓄᓇᖓᓂ ᑲᑎᒪᑎᓪᓗᒋᑦ ᐳᕕᕐᓂᑐᒥ 2005-ᒥ. ᑖᕙᓂ, ᑐᑭᑖᕈᑕᐅᓯᒪᔪᖅ ᐊᕐᓀᑦ ᐃᓚᒌᑦᑐᑦ ᓄᐃᑦᓯᓕᕋᔭᕐᑎᓗᒋᑦ ᐊᒻᒪᓗ ᐱᒋᐊᕐᑎᓯᒋᐊᓪᓚᓗᑎᒃ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓂᒃ ᓄᓇᕕᒻᒥ, ᐊᒻᒪᓗ ᓄᑖᖅ ᑲᑐᑦᔨᖃᑎᒌᓐᓂᖅ ᓇᓗᓀᕐᑕᐅᓕᕐᑐᕕᓂᖅ 2006-ᒥ ᐊᒻᒪᓗ ᐱᒻᒪᕆᑎᒍᑦ ᐃᓕᑕᕆᔭᐅᓂᖃᓕᕐᓱᓂ ᑭᒡᒐᑐᕐᑎᐅᒋᐊᖓ ᐃᓄᐃᑦ ᐊᕐᓀᑦ ᐅᖃᐅᓯᕆᔭᐅᖁᔭᖏᑎᒍᑦ. ᑐᑭᖓᓂᒃ ᓴᑐᕐᕖᑦ ᑐᓴᐅᒪᖕᖏᑐᓄᑦ, ᐅᖃᐅᓯᕐᑕᓚᕆᖓ, ᓴᑐᖅ, ᑐᑭᓕᒃ “ᐊᓯᐊᓯᒪᔪᕕᓂᕐᒥᒃ ᐅᑎᕐᑎᓯᓂᖅ”. ᓴᑐᕐᕖᑦ ᐊᑕᐅᓯᐅᑉ ᐅᖓᑖᓄᑦ ᐅᖃᕐᑕᐅᓕᕐᒪᑕ ᐊᒻᒪᓗ ᑐᑭᖃᕐᓱᓂ “ᑌᒃᑯᐊ ᐊᓯᐅᒪᓕᕐᑐᕕᓂᕐᓂᒃ ᐅᑎᕐᑎᓯᔪᑦ” ᑕᑯᑦᓴᐅᑎᑦᓯᔪᖅ ᓯᕗᓂᕐᒥ ᓂᕆᐅᑦᓯᐊᓇᕐᑐᓂᒃ ᐅᑎᕐᑎᑕᐅᓚᖓᓕᕐᑎᓗᒋᑦ ᐃᓗᒡᒍᓯᑦᑎᓄᑦ ᐃᓚᐅᓪᓚᕆᑦᑐᑦ ᐊᓯᐊᔨᓯᒪᓕᕐᑕᕕᓂᕗᑦ, ᐅᑎᕐᑎᑕᐅᑎᓪᓗᒋᑦ ᐃᓄᐃᑦ ᐱᐅᓯᕐᒥᑎᒍᑦ ᐱᓇᓱᐊᕈᓯᖏᑦ ᐊᒻᒪᓗ ᐃᓄᐃᑦ ᑭᓇᐅᓂᕐᒥᓂᒃ ᐅᐱᒪᒋᔭᖃᕈᑎᖏᑦ.

ᑲᑎᒪᔨᕗᑦ ᑲᑎᒪᑎᓪᓗᒋᑦ ᑰᑦᔪᐊᒥ ᐊᐅᒍᓯᑎ 15-ᒥᑦ 17-ᒧᑦ ᑕᑯᒐᓱᐊᕈᓐᓇᓯᓯᒪᔪᒍᑦ ᓇᓗᓀᕐᑐᐃᓯᒪᐅᑎᓂᒃ ᐸᕐᓀᒍᑎᒥᒃ ᓄᓇᕕᒻᒥ ᐊᒻᒪᓗ ᐅᓪᓗᓕᒫᕐᑐᖅ ᑲᑎᒪᐅᑎᒋᑦᓱᒋᑦ ᐃᓗᓕᕙᓪᓗᖏᑦ. ᐃᓄᐃᑦ ᐊᕐᓀᑦ ᖃᐅᔨᒍᒪᓯᒪᔪᑦ ᐊᑦᔨᒌᖕᖏᑐᓂᒃ ᐃᓱᐃᓗᑕᕐᓂᒃ ᑐᑭᓯᓇᕐᑎᑕᐅᓯᒪᔪᓂᒃ ᐸᕐᓀᒍᑎᒥ ᓄᓇᕕᒻᒥ ᐊᒻᒪᓗ ᑲᔪᓯᑎᑦᓯᒍᒪᑦᓱᑎᒃ ᕿᒥᕐᕈᓂᕐᓂᒃ ᐱᓀᓗᑕᕐᓂᒃ ᐃᓱᒫᓘᑎᖃᕈᑎᓂᒃ. ᐱᒻᒪᕆᑦᑕᖏᓐᓂᒃ ᐅᖃᐅᓯᖃᕈᓐᓇᓯᒪᔪᒍᑦ ᐃᑉᐱᒋᔭᕐᑎᓂᒃ ᐅᖃᐅᓯᕆᔭᐅᔪᑦᓴᐅᒋᐊᖏᑦ ᑕᕝᕙᓂ ᑲᑎᒪᓂᕐᒥ.

ᑲᑎᒪᔨᕗᑦ ᑲᑎᒪᑎᓪᓗᒋᑦ ᑰᑦᔪᐊᒥ ᐊᐅᒍᓯᑎ 15-ᒥᑦ 17-ᒧᑦ ᑕᑯᒐᓱᐊᕈᓐᓇᓯᓯᒪᔪᒍᑦ ᓇᓗᓀᕐᑐᐃᓯᒪᐅᑎᓂᒃ ᐸᕐᓀᒍᑎᒥᒃ ᓄᓇᕕᒻᒥ ᐊᒻᒪᓗ ᐅᓪᓗᓕᒫᕐᑐᖅ ᑲᑎᒪᐅᑎᒋᑦᓱᒋᑦ ᐃᓗᓕᕙᓪᓗᖏᑦ. ᐃᓄᐃᑦ ᐊᕐᓀᑦ ᖃᐅᔨᒍᒪᓯᒪᔪᑦ ᐊᑦᔨᒌᖕᖏᑐᓂᒃ ᐃᓱᐃᓗᑕᕐᓂᒃ ᑐᑭᓯᓇᕐᑎᑕᐅᓯᒪᔪᓂᒃ ᐸᕐᓀᒍᑎᒥ ᓄᓇᕕᒻᒥ ᐊᒻᒪᓗ ᑲᔪᓯᑎᑦᓯᒍᒪᑦᓱᑎᒃ ᕿᒥᕐᕈᓂᕐᓂᒃ ᐱᓀᓗᑕᕐᓂᒃ ᐃᓱᒫᓘᑎᖃᕈᑎᓂᒃ. ᐱᒻᒪᕆᑦᑕᖏᓐᓂᒃ ᐅᖃᐅᓯᖃᕈᓐᓇᓯᒪᔪᒍᑦ ᐃᑉᐱᒋᔭᕐᑎᓂᒃ ᐅᖃᐅᓯᕆᔭᐅᔪᑦᓴᐅᒋᐊᖏᑦ ᑕᕝᕙᓂ ᑲᑎᒪᓂᕐᒥ.

ᑕᑯᕐᖄᓯᒪᔭᑦᑎᓄᑦ ᐃᓚᐅᓯᒪᔪᖅ ᓄᓇᕕᒻᒥ ᐸᕐᓀᒍᑎᓂ ᐱᓯᒪᔪᖅ ᑕᑲᒃᑯᓇᖕᖓᑦ ᐅᖃᐅᓯᐅᓯᒪᔪᓂᑦ, ᓇᓗᓀᕐᑕᐅᓯᒪᑦᓱᓂ Plan Nord-ᑉ ᐊᓪᓚᖁᑎᖏᓐᓂ. ᐃᒣᓕᔪᑦ:

ᒪᑭᑉᐸᓕᐊᒐᓱᐊᕐᓂᖅ ᒪᑯᓂᖓ ᖄᖏᕐᓂᑯᓕᐅᒐᓱᐊᕈᓯᕐᓂᒃ ᐊᑐᕐᓱᓂ ᐃᑯᒪᓕᐅᕐᓂᒥ ᐅᔭᕋᓐᓂᐊᓂᕐᒥ ᕿᔾᔨᕆᓂᕐᓂ ᓱᖃᑦᓯᑎᑦᓯᓂᕐᒥ ᓂᐅᕐᕈᑐᓕᕆᓂᕐᒥ ᐃᖏᕐᕋᐅᑎᓕᕆᓂᕐᒥ ᐆᒪᔪᓕᕆᓂᕐᒥᓗ, ᐊᒻᒪᓗ ᓄᓇᓖᑦ ᐱᕙᓪᓕᐅᑎᑦᓴᖏᓐᓄᑦ ᒪᑭᑉᐸᓕᐊᒐᓱᐊᕈᑏᑦ ᐊᑐᖏᓐᓇᓯᐊᕐᓗᑎᒃ ᑐᖕᖓᕕᖃᑦᓯᐊᑐᓂᒃ ᐃᓗᕐᕈᓯᕐᒥᒃ ᑭᓇᐅᓂᕐᒥᓗ ᐃᓕᑕᕐᓯᓯᐊᕐᓂᒃ.

ᑲᒪᒋᔭᖃᕈᑎᑦᓴᖅ ᑲᔪᓯᖏᓐᓇᓚᖓᔪᓂᒃ ᐱᕙᓪᓕᐊᑎᑦᓯᓂᑎᒍᑦ ᓯᕗᒧᐊᒍᑕᐅᑎᓪᓗᒍ ᑐᕌᖓᓪᓚᕆᑦᑐᖅ ᐱᓇᓱᒐᖅ ᑲᑎᕐᓱᐃᓯᒪᕕᐅᓚᖓᓗᓂ ᐃᑯᒪᐅᑎᓄᑦ, ᐅᔭᕋᕐᓂᐊᓂᕐᓄᑦ, ᐱᖕᖑᐊᓂᕐᓄᑦ, ᓂᐅᕐᕈᑐᓕᕆᓂᕐᓄᑦ, ᐃᖏᕐᕋᐅᑎᓕᕆᓂᕐᓄᑦ, ᐊᒻᒪᓗ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ, ᐊᒻᒪᓗ ᐱᕙᓪᓖᒋᐊᕐᓃᑦ ᐱᕈᕐᐸᓕᐊᓂᖏᓐᓂᒃ ᓄᓇᓕᓐᓂ ᐋᕐᕿᓯᒪᑎᓪᓗᒋᑦ ᑕᑯᑦᓴᐅᑎᑦᓯᓗᑎᒃ ᐃᓗᒡᒍᓯᖓᓂᒃ ᐊᒻᒪᓗ ᑭᓇᐅᓂᖏᓐᓂᒃ.

ᐊᒻᒪᓗ ᐅᖃᐅᓯᕆᔭᐅᓕᕐᕿᑖᕐᓯᒪᒻᒪᑦ ᐊᒥᓱᐃᓂ ᑲᑎᒪᓂᒻᒪᕆᓐᓂ ᑕᕝᕙᓂ, ᐱᒻᒪᕆᖁᑎᒋᔭᐅᔪᖅ ᐃᓗᒡᒍᓯᖅ ᐊᒻᒪᓗ ᑭᓇᐅᓂᕐᓂᒃ ᓄᐃᑕᑎᑦᓯᒍᑏᑦ ᐃᒣᓕᖓᒋᐊᖃᓚᕿᑎᑦᓯᓯᒪᔪᖅ ᓵᑉᑕᖓ ᐃᓗᒡᒍᓯᓄᐊᖓᔪᖅ ᐊᒻᒪᓗ ᑭᓇᐅᓂᕐᓂᒃ ᓇᓗᓀᕐᓯᓯᒪᒍᑎᓄᐊᖓᔪᖅ ᓯᕗᓪᓕᐸᐅᑎᓪᓗᒍ ᐃᓕᒪᑎᑕᐅᒋᐊᖃᕐᐳᖅ ᐊᓪᓚᓯᒪᔪᓂ ᓇᓗᓀᕐᓯᓯᒪᐅᑎᓂ ᐆᑦᑑᑎᒋᓗᒋᑦ ᓄᓇᕕᐅᑉ ᐸᕐᓀᒍᑎᖓ, ᐅᕝᕙᓘᓐᓃᑦ ᑭᖑᓪᓕᐹᑦ ᓵᑉᑕᖏᓐᓃᑐᑦ ᓇᓗᓀᕐᓯᐅᑎᒻᒪᕆᑦᑕᖃᕐᓗᑎᒃ ᐱᒻᒪᕆᐅᓂᕐᐹᖁᑎᒋᔭᐅᓂᖓᓂᒃ. ᖃᓄᐃᓕᖓᒍᑎᖃᕐᓂᕗᑦ ᐃᓅᑦᓱᑕ ᐊᑦᔨᒋᔭᐅᖕᖏᑐᒥᒃ ᐃᓗᒡᒍᓯᖃᕐᓱᑕ ᑕᑯᑦᓴᐅᑎᑦᓯᓚᕿᒋᐊᖃᕋᑦᑕ ᖃᓄᐃᓕᖕᙰᓚᕿᒍᓐᓇᓂᖏᓐᓂᒃ ᑖᑦᓱᒪ ᐋᕐᕿᓱᐃᓯᒪᑎᑦᓯᐅᑎᐅᑉ, ᐆᑦᑑᑎᒋᑦᓱᒍ Plan Nord, ᐱᑕᖃᕐᑎᓯᐅᑎᒍᓐᓇᕕᖓᑎᒍᑦ.

ᐃᓱᐃᓗᑌᑦ ᐃᓱᐃᓗᑕᖅ ᐃᓕᓴᕐᓂᓕᕆᓂᕐᓄᐊᖓᔪᖅ ᑭᖕᖒᒪᒋᔭᐅᔪᖅ ᐃᓄᓐᓄᑦ ᐱᓇᓱᑦᑎᒪᕆᓐᓄᑦ ᐅᔭᕋᕐᓂᐊᓂᑐᐃᓐᓇᐅᖏᑦᑐᓂ ᐊᑐᕆᐊᖃᕐᒪᑦ ᐃᓘᓐᓇᒐᓴᖏᓐᓄᑦ ᐱᓇᓱᕝᕕᒋᔭᐅᔪᓄᑦ ᐃᓅᖃᑎᒌᓂ ᑭᒡᒐᑐᕐᑕᕗᓐᓂ. ᑭᓪᓕᖃᓗᐊᕐᓂᖓ ᑭᖕᖒᒪᓇᓚᕿᑎᑦᓯᔪᖅ ᐃᓄᓐᓂᒃ ᐱᓇᓱᑦᑎᒪᕆᓐᓂᒃ ᐊᒻᒪᓗ ᖃᓄᕐᑑᕈᑎᒋᒋᐊᒥᒃ ᑖᓐᓇ ᑭᖕᖒᒪᓇᕐᑐᖅ ᐱᑕᑦᓯᒐᓱᐊᕆᐊᒥᒃ ᐱᔭᕐᓃᑑᑦᓱᓂ. ᑫᓪᓗᑐᐃᒍᓐᓇᓂᕗᑦ ᐊᒻᒪᓗ ᐃᑲᔪᕐᓯᒍᓐᓇᓂᕗᑦ ᐃᓄᓐᓂᒃ ᐃᓕᓴᕐᓂᒥᓂᒃ ᑲᔪᓯᑎᑦᓯᐊᕋᓱᐊᕐᓗᒋᑦ ᐱᔭᕐᓃᑐᒻᒪᕆᐅᔮᕐᒪᑦ. ᐊᒻᒪᓗ, ᐃᓱᐃᓗᑕᐅᕙᑦᑐᖅ ᐃᓄᐃᑦ ᐃᓕᓴᕐᓂᒥᓂᒃ ᐱᔭᕇᕐᑐᑦ ᐃᓕᑕᕆᔭᐅᒍᑎᑖᕐᐸᖁᑦᓱᒋᑦ ᐅᖃᕐᑕᐅᓕᐅᒥᔮᕐᐸᒪᑕ ᐊᕝᕕᐊᓗᑕᐅᓂᖏᑦ ᐃᓕᑕᕆᔭᐅᒍᑎᖃᖕᖏᑐᑦ ᐊᒥᓲᖕᖏᑐᑦ ᐃᓄᐃᑦ ᑎᒍᒥᐊᕐᒪᑕ ᐃᓕᑕᕆᔭᐅᒍᑎᓂᒃ ᐱᓇᓱᐊᕋᑦᓭᑦ ᐃᓚᖏᓐᓂ ᐆᑦᑑᑎᒋᓗᒋᑦ ᓴᓇᓂᕐᓂ. ᑲᑎᒪᔨᖁᑎᕗᑦ ᓄᐃᑦᓯᒍᒪᔪᑦ ᐃᓗᒡᒍᓯᑎᒍᑦ ᓄᑭᑖᕐᑎᓯᒍᑎᓂᒃ ᐊᒻᒪᓗ ᐃᓕᐅᕐᖃᑕᐅᓂᕐᓴᐅᓯᑎᓪᓗᒋᑦ ᐅᓄᕐᓂᓭᑦ ᐃᓄᐃᑦ ᐱᓇᓱᑦᑎᖑᕐᑎᑕᐅᒍᓐᓇᓯᓗᑎᒃ ᐃᓄᐃᑦ ᑎᒥᖁᑎᖏᓐᓂ.

ᑫᓪᓗᑕᐅᒍᑎᒋᒐᔭᕐᑕᖏᑦᑕ ᐃᓄᐃᑦ ᐃᓚᖓᑦ ᐃᓕᑕᕆᔭᐅᒍᑎᑖᕐᐸᖁᓗᒋᑦ ᓄᐃᑦᓯᓂᖅ ᐳᕐᑐᓂᕐᓭᑦ ᐅᖓᑖᓅᕐᑐᓂᒃ ᐃᓕᓴᕐᕕᒥᒃ ᓄᓇᕕᒻᒥ. ᐊᒻᒪᓗ ᓈᒻᒪᒐᔭᕐᓱᓂ ᑐᑭᓯᓇᕐᑎᑕᐅᑦᓯᐊᐸᑦ ᓄᓇᕕᒻᒧᑦ ᐸᕐᓀᒍᑎᒥ ᓄᓇᕕᒻᒥ ᐳᕐᑐᓂᕐᓭᑦ ᐅᖓᑖᓅᕐᑐᓂᒃ ᐃᓕᓴᕐᕕᑖᕆᐊᖃᕐᓂᖓ. ᐳᕐᑐᓂᕐᓭᑦ ᐅᖓᑖᓅᕐᑐᓂᒃ ᐃᓕᓴᕐᕕᒃ ᓄᐃᑕᐅᒋᐊᓕᒃ ᐃᓄᐃᑦ ᐃᓱᒪᑕᐅᒍᑎᖏᓐᓂᒃ ᑐᖕᖓᕕᖃᕐᑎᓗᒍ.

ᐊᓯᐊ ᐃᓕᓴᕐᓂᒧᐊᖓᒻᒥᔪᖅ ᐃᓕᑕᕆᔭᐅᒍᑎᑖᕐᑕᐅᒍᓐᓇᓯᒋᐊᖃᕐᓂᖏᑦ ᐃᓄᐃᑦ ᐆᒪᔪᕐᓯᐅᑏᑦ ᑲᕙᒪᒃᑯᓄᑦ ᐊᒻᒪᓗ ᐃᓕᓴᕐᓂᓕᕆᓂᕐᓄᑦ ᐱᓇᓱᕝᕕᓄᑦ. ᐃᓄᐃᑦ ᐆᒪᔪᕐᓯᐅᑏᑦ ᐃᓕᑕᕆᔭᐅᒍᑎᖃᖕᖏᓗᐊᕐᐸᒪᑕ ᑭᑎᑕᐅᓂᖃᓕᕐᒪᑦ ᑐᑭᓯᐅᑎᑦᓭᑦ ᐳᑯᑦᑕᐅᑎᓪᓗᒋᑦ ᐃᓕᓴᕐᓂᑎᒍᑦ ᐱᔭᐅᓚᕿᓯᒪᔪᓂᒃ ᐃᓄᓐᓄᑦ. ᐃᓘᓐᓇᑎᐅᖕᖏᑐᖅ ᐃᓄᐃᑦ ᐳᕐᑐᓂᕐᓭᑦ ᐅᖓᑖᓃᑦᑐᓂᒃ ᐃᓕᓴᕐᓕᑕᕆᔭᐅᖕᖏᑐᑦ, ᑭᓯᐊᓂ ᐃᓄᐃᑦ ᐊᖑᑏᑦ ᒪᙯᑦᑎᐅᓂᕐᒥᓂᒃ ᑲᔪᓯᑎᑦᓯᓚᖓᔪᑦ.

ᐃᓘᓐᓈᓗᖏᓐᓂᒃ ᐃᓄᓐᓂᒃ ᐃᓕᓴᕐᓂᒥᑎᒍᑦ ᐱᓚᕿᒐᔭᕐᓂᖏᑦ ᓂᕆᐅᒋᔭᐅᔪᑦᓴᐅᖏᑦᑑᒐᓗᐊᑦ ᐅᖃᓪᓚᕆᖕᖑᐊᕋᓱᐊᕐᐸᑐᓄᑦ ᐃᓄᐃᑦ ᐃᓕᓴᕐᓂᒥᑎᒍᑦ ᐱᓚᕿᓯᒪᔭᖏᓐᓄᑦ. ᑖᒃᑯᐊ ᑲᔪᓯᑎᑦᓯᐅᑎᑦᓭᑦ ᐃᓕᒪᑎᑕᐅᒋᐊᓖᑦ ᐃᓕᑕᕆᔭᐅᒍᓐᓇᓯᑎᓪᓗᒋᑦ ᑐᓂᕐᕈᓯᕙᓐᓂᖏᑦ ᐃᓄᐃᑦ ᐆᒪᔪᕐᓯᐅᑏᑦ ᐃᓄᖁᑎᑦᑎᓄᑦ, ᐆᑦᑑᑎᒋᓗᒋᑦ ᖃᑦᓯᐅᒪᖔᑕ ᐆᒪᔪᕐᓯᐅᑏᑦ ᓄᓇᓕᓐᓂ ᑭᑎᑕᐅᓗᑎᒃ, ᐃᓅᖃᑎᒌᑦ ᒪᑭᑕᒐᓱᐊᕐᓂᖏᓐᓄᑦ ᑐᓂᕐᕈᓯᕙᑦᑐᑦ ᐊᒻᒪᓗ ᐊᓯᖏᑎᒍᑦ. ᓄᐃᑕᐅᒋᐊᖃᕐᐳᖅ ᐃᓗᒡᒍᓯᕐᒥᒃ ᐃᓕᓐᓂᐊᑎᑦᓯᕕᒃ.

ᐱᒻᒪᕇᑦ ᐃᓅᖃᑎᒌᓐᓂᒥ ᐱᓀᓗᑌᑦ ᓄᓇᓕᓐᓂ ᐃᓱᒪᒥᐅᑕᕆᔭᐅᕙᑦᑐᑦ ᐊᒥᓱᓄᑦ ᐃᓄᓐᓄᑦ ᐊᕐᓇᓄᑦ. ᐃᒥᐊᓗᒻᒥᒃ ᐊᑐᕐᓂᓗᓐᓂᖅ, ᐃᓚᒌᓂ ᐱᒋᐊᖃᑦᑖᖃᕐᓂᖅ, ᑲᒃᑲᓛᑦ ᑲᒪᒋᔭᐅᑦᓯᐊᖏᓐᓂᖏᑦ, ᐃᓄᐊᕐᑐᑦ ᐊᒻᒪᓗ ᐃᒻᒥᓂᐊᕐᑐᑦ ᐃᓘᓐᓇᑎᒃ ᐊᕐᓱᕈᓐᓂᖃᕐᑎᓯᕙᒻᒪᑕ ᐊᒥᓱᐃᓂᒃ. ᐃᓚᒌᑦ ᑫᓪᓗᑐᕐᑕᐅᕙᒋᐊᖃᕐᐳᑦ ᐱᓀᓗᑕᕐᓂᒃ ᑲᒪᒋᐊᖁᓗᒋᑦ ᐊᑑᑎᕙᑦᑕᒥᓂᒃ, ᐃᑲᔪᕐᑎᓴᓂᒃ ᕿᓂᕈᑎᒋᕙᓪᓗᒋᑦ. ᐊᒻᒪᓗ ᓄᓇᓖᑦ ᐊᑐᐃᓐᓇᖃᕐᑎᑕᐅᒋᐊᓖᑦ ᐃᓱᒪᒃᑯᑦ ᐃᓗᓯᕐᓱᓂᕐᓂ ᐱᓇᓱᑦᑎᓚᕆᓐᓂᒃ ᐃᑲᔪᕐᐸᓂᐊᕐᑎᓗᒋᑦ ᐃᑲᔪᕐᑕᐅᒋᐊᓕᓐᓂᒃ. ᓴᑐᕐᕖᑯᑦ ᑕᑯᓐᓇᑐᑦ ᑭᖕᖒᒪᓇᕐᓂᖏᓐᓂᑦᒃ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᐊᕈᑦᔨᐅᑏᑦ ᐱᓇᓱᑦᑎᒪᕆᓐᓄᐊᖓᔪᑦ, ᐃᓱᒪᒃᑯᑦ ᐃᓗᓯᕐᓱᓂᑎᒍᑦ ᑕᓯᐅᕐᓯᓯᒪᔨᖕᖑᕈᓐᓇᓯᓗᑎᒃ ᐊᒻᒪᓗ ᐊᓯᖏᓐᓂ ᐱᓇᓱᑦᑎᒪᕆᖕᖑᓗᑎᒃ ᐃᓘᓐᓀᓂ ᓄᓇᓕᓐᓂ.

ᐱᒃᑭᓂᐅᒍᑎᖃᒻᒪᕆᑦᑐᓄᑦ ᑖᒃᑯᓄᖓᑐᐊᖅ ᐃᑲᔪᕐᓯᒪᔭᐅᒐᓱᐊᕐᑎᑐᐃᓐᓇᐅᖃᔭᑦᔭᖏᓐᓇᑕ ᐊᒻᒪᓗ ᒋᐊᖃᑦᔭᒐᑕ ᐱᓇᓱᑦᑎᑖᒍᓯᒪᔪᓄᑦ ᓄᓇᕕᐅᑉ ᓯᓚᑖᓂᑦ ᐊᒻᒪᓗ ᑎᑭᓯᒪᑫᓐᓈᐱᑐᐃᓐᓇᐸᑦᑐᓄᑦ ᒪᓂᔨᒋᐊᕐᑐᓱᑎᒃ ᐃᓱᒪᒃᑯᑦ ᐃᓗᓯᕐᓱᓂᓕᕆᓂᕐᓄᑦ ᓴᐳᑦᔨᒋᐊᕐᑐᓱᑎᒃ ᐃᑲᔪᕐᑕᐅᒋᐊᓕᓐᓂᒃ. ᐊᒻᒪᓗ ᓄᐃᑕᐅᒃᑲᓂᕆᐊᖃᕐᓱᑎᒃ ᒪᒥᓴᕐᕖᑦ ᐃᑲᔪᕐᓯᒪᕖᑦ ᑐᕌᖓᔪᑦ ᐱᓀᓗᑕᓕᓐᓄᑦ ᐋᖓᔮᓐᓇᑐᓂᒃ ᐊᒻᒪᓗ ᐃᒥᐊᓗᓐᓂᒃ ᐱᓀᓗᑕᐅᕙᑦᑐᓂᒃ ᓄᓇᕕᒻᒥ.

ᐊᕐᓱᕈᓐᓇᐸᓪᓕᐊᑐᐃᓐᓇᑐᕐᓗ ᑲᒃᑲᓛᑦ ᑲᒪᒋᔭᐅᑦᓯᐊᖏᓐᓂᖏᓐᓄᑦ, ᑲᒃᑲᓛᑦ ᐅᖑᒪᔭᐅᒋᐊᖃᕐᓂᖏᓐᓄᑦ, ᓱᓕ ᐱᕙᓪᓕᐊᑐᐃᓐᓇᓱᑎᒃ. ᑲᒃᑲᓛᑦ ᐊᑦᑕᓇᖕᖏᑐᓂᒃ ᐃᑎᕐᓯᒪᕕᖃᕐᐸᒋᐊᖃᕐᐳᑦ ᐁᕕᒋᒋᐊᖏᑦ ᐃᓂᕐᑑᒪᓇᖕᖏᑐᓂᒃ, ᐱᓗᐊᕐᑐᒥ ᐅᕕᒃᑫᑦ ᓴᐳᒻᒥᔨᖏᓐᓄᑦ ᑲᒪᒋᔭᐅᕙᑦᑐᑦ ᐊᒻᒪᓗ ᐅᓐᓄᐊᒥ ᓯᓂᑦᑕᕕᑦᓴᓯᐅᕐᐸᑐᑦ ᐊᖓᔪᕐᖄᖏᑦ ᐋᖓᔮᓕᕐᒪᑕ ᐊᓇᕐᕋᒥᓂ. ᖃᓄᕐᑑᕈᑎᒋᓗᒋᑦ ᐃᒥᐊᓗᒻᒥᒃ ᐊᑐᕐᓂᓗᓐᓃᑦ ᐊᒻᒪᓗ ᓄᐃᑎᕐᓗᒋᑦ ᑲᒃᑲᓛᓄᑦ ᑭᖕᖒᒪᔭᐅᕙᑦᑐᑦ ᐊᑦᑕᓇᖕᖏᑐᒦᕝᕕᓭᑦ. ᓴᓇᔭᐅᒍᓐᓇᑐᑦ ᑲᒃᑲᓛᓂᒃ ᐃᑲᔪᕐᓯᒪᕖᑦ ᐃᑉᐱᒍᓱᓕᕐᑎᑕᐅᒋᐊᕐᑎᓗᒋᑦ ᐃᓄᐃᑦ ᑲᒃᑲᓛᑦ ᐱᔪᓐᓇᐅᑎᖏᓐᓂᒃ. ᑕᒪᓐᓇ ᑲᔪᓯᑎᑕᐅᒍᓐᓇᑐᖅ ᐃᑲᔪᕐᑎᓗᒋᑦ ᐅᔭᕋᕐᓂᐊᕖᑦ ᓄᐃᑦᓯᒍᒪᔪᑦ ᐱᓇᓱᐊᕐᕕᒋᓂᐊᕐᑕᒥᓂᒃ ᓄᓇᕕᒻᒥ ᓄᓇᓖᑦ ᓴᓂᖏᓐᓂ. ᐃᒫᓪᓗ ᐅᖃᕆᐊᓪᓚᓗᒍ ᐱᓇᓱᕝᕕᖃᕐᓂᑎᒍᑦ ᓄᐃᑎᕐᑕᐅᒋᐊᖃᕐᐳᑦ ᑲᒪᕕᐅᕙᓐᓂᐊᑐᓂᒃ ᐃᓅᖃᑎᒌᓂ ᐱᓀᓗᑕᕐᓂᒃ: ᐃᓕᓴᕐᕖᑦ ᐱᐅᓂᕐᓭᑦ, ᒪᒥᓴᕐᕖᑦ, ᐱᓇᓱᐊᕈᑦᔨᐅᑏᑦ ᐊᒻᒪᓗ ᑭᒡᒐᑐᕐᕖᑦ.

ᐊᓯᒋᒻᒥᔭᖓ ᐱᓀᓗᑕᕆᔭᐅᔪᖅ ᐊᒥᓱᓄᑦ ᐊᔪᕐᓴᓂᖅ. ᑐᓴᕐᑎᓯᐅᑏᑦ ᓄᓇᕕᒻᒥ ᐊᔪᕐᓴᓂᕐᓄᑦ, ᖃᐅᔨᒪᔭᐅᔪᓂᒃ ᐅᖃᐅᓯᖃᕐᕕᒋᔭᐅᓯᒪᔪᑦ ᔦᕌ ᑐᐁᒻᒧᑦ ᖃᐅᔨᑎᑦᓯᒍᑕᐅᓯᒪᔪᑦ ᐊᔪᕐᓴᒪᑕ 20-ᓂᑦ 30%-ᓄᑦ ᐊᓇᕐᕋᕆᔦᑦ ᓄᓇᕕᒻᒥ, ᐊᒻᒪᓗ 44% ᓇᒻᒥᓂᕆᔭᐅᔪᓂ ᐊᓇᕐᕋᕆᔭᕐᓂ ᐃᑭᓐᓂᓴᖏᓐᓂᒃ ᐃᓱᕐᕆᐅᑎᐅᒍᓐᓇᑐᑦ ᑮᓇᐅᕐᔭᓴᕐᓱᑎᒃ. ᑖᒃᑯᐊ ᐱᖓᓱᕕᓪᓗᐊᓱᑎᒃ ᓄᓇᕕᒻᒥ ᐊᔪᕐᓴᑐᑦ ᐅᓄᕐᓂᓭᑦ ᖃᓪᓗᓈᑦ ᓄᓇᖓᓂᒥᑦ ᑯᐯᒻᒥᑦ. ᐅᓄᕐᓂᓴᖏᑦ ᐃᓄᐃᑦ ᐊᔪᕐᓴᑐᑦ ᐃᓄᑑᑦᔨᔪᑦ ᕿᑎᕐᖓᒥᓂᒃ.

ᐊᒻᒪᓗ ᖃᐅᔨᒪᔭᑦᑎᒍᑦ, ᑖᒃᑯᐊ ᐊᕐᓀᑦ ᐅᕕᒃᑲᕙᓪᓗᐃᑦ. ᑕᒪᓐᓇ ᓯᕗᓂᕐᓗᓇᕐᑐᖅ ᐱᐅᓯᐅᕙᑦᑐᖅ ᑲᒪᒋᔭᐅᒋᐊᕆᐊᓕᒃ. ᓄᓇᓖᑦ ᐃᓚᖏᑦ ᐱᕙᓪᓕᖁᑎᑖᕐᐸᑲᓗᐊᕐᑎᓗᒋᑦ ᐅᔭᕋᕐᓂᐊᑏᑦ ᖄᖏᕐᓂᑯᖏᓐᓄᑦ ᕌᖕᑲᓚᓐ ᐅᔭᕋᕐᓂᐊᕕᒻᒥᑦ ᐊᒻᒪᓗ ᑖᒃᑯᐊ ᐊᔪᕐᓴᖏᓐᓂᓴᐅᕙᑦᓱᑎᒃ ᐃᓚᖏᑦ ᑭᓯᐊᓂ ᐊᒥᓲᖏᓐᓈᑐᑦ ᐃᓕᒃᑰᑎᕐᑐᑦ ᐊᔪᕐᓴᓂᕐᒦᑐᐃᓐᓇᓚᖓᔪᑦ ᐅᔭᕋᕐᓂᐊᑏᑦ ᐃᒻᒥᓂᒃ ᐊᑦᓱᐃᓕᑎᓪᓗᒋᑦ ᐅᔭᕋᕐᑕᓱᑎᒃ ᓄᓇᕕᒻᒥ. ᓇᓂᔨᒋᐊᖃᕐᑐᒍᑦ ᐋᕐᕿᓯᒪᐅᑎᑦᓴᓂᒃ ᐊᒻᒪᓗ ᐱᓀᓗᑕᕐᒥᒃ ᐊᔪᕐᓴᓂᕐᒥᒃ ᓄᐃᑕᒍᓐᓀᑎᑦᓯᐅᑎᑦᓴᓂᒃ ᓄᓇᓕᓐᓂ. ᐅᔭᕋᕐᓂᐊᑏᑦ ᐅᔭᕋᕐᑕᖃᑦᑕᓚᖓᔪᑦ ᓄᓇᕕᐅᑉ ᓄᓇᓕᖏᓐᓂ ᐱᓇᓱᐊᖃᑎᖃᕆᐊᖃᕐᐳᑦ ᐃᓄᓐᓂᒃ ᐋᕐᕿᐅᑎᑦᓴᓂᒃ ᓇᓂᔨᖃᑎᒋᓗᒋᑦ ᐊᔪᕐᓴᓂᖏᓐᓂᒃ ᐅᕕᒃᑫᑦ ᐊᕐᓀᑦ ᐃᑯᓪᓚᐅᒥᑎᑦᓯᒍᑕᐅᓚᖓᔪᓂᒃ. ᓄᓇᕕᒻᒥ ᐊᔪᕐᓴᓇᖕᖏᑐᒥᒃ ᑕᑯᓚᖓᒍᒪᒍᑦᑕ ᐊᔪᕐᓴᓂᕐᓗ ᐃᑯᓪᓚᑎᕐᑕᐅᒋᐊᓚᖓᑉᐸᑦ ᐊᒻᒪᓗ ᒪᑭᑕᒐᓱᐊᕐᓂᓄᑦ ᐸᕐᓀᒍᑏᑦ ᑐᕌᖓᔪᑦ ᓄᓇᓖᑦ ᐃᓄᖏᓐᓄᑦ ᐱᕙᓪᓕᓯᒪᔭᐅᒍᓐᓇᓯᐅᑎᐅᓚᖓᑎᓪᓗᒋᑦ Plan Nord-ᒧᑦ ᐱᕙᓪᓕᐊᑎᑕᐅᔪᓂᒃ ᑖᒃᑯᑑᑎᓪᓗᒋᑦ ᐱᓇᓱᒐᑦᓭᑦ ᓄᐃᑎᕐᑕᐅᓂᖏᓐᓅᖏᑦᑐᖅ ᐊᒻᒪᓗ ᑮᓇᐅᑦᔭᓵᖏᓐᓅᖕᖏᑐᖅ ᒪᓂᔭᐅᕙᑦᑐᓄᑦ ᐅᔭᕋᕐᓂᐊᑎᓄᑦ.

ᐊᒻᒪᓗ, ᐱᓀᓗᑕᖕᖑᑐᐃᓐᓇᕆᐊᓖᑦ ᓄᐃᑕᑦᓱᑎᒃ ᐃᓕᖓᔪᑦ ᐅᔭᕋᕐᓂᐊᕕᓐᓂ ᐊᒻᒪᓗ ᐊᕐᓇᓄᑦ. ᓯᕿᓂᕐᒥ ᓄᓇᖃᕐᖄᑐᕕᓃᑦ ᓄᓇᓕᖏᓐᓂ ᐊᕐᓀᑦ ᐊᓇᕐᕋᖏᓐᓂ, ᑕᑯᑦᓴᐅᑎᑕᐅᕙᑦᑐᑦ ᑎᒥᒥᓂᒃ ᐊᑐᒐᐅᑎᑦᓯᓃᑦ ᓄᓇᖃᕐᖄᑐᕕᓃᑦ ᓄᓇᓕᖏᑦᑕ ᖃᓂᑦᑕᖏᓐᓂ ᐅᔭᕋᕐᓂᐊᑎᓄᑦ ᐊᑐᒐᐅᑎᑦᓱᑎᒃ. ᐃᓱᒪᒋᔭᖃᕐᓯᒪᔪᒍᑦ ᑌᒣᑐᐃᓐᓇᕆᐊᖃᕐᓂᖏᑦ ᐃᓄᐃᑦ ᐊᕐᓀᑦ ᓄᓇᕕᒻᒥᐅᑦ ᐃᓂᕐᑑᒪᓇᖕᖏᓂᕐᓴᐅᒐᓗᐊᑦ ᒪᕐᕈᐃᒃ ᐅᔭᕋᕐᓂᐊᕖᒃ ᐃᖏᕐᕋᔫᒃ ᐅᓪᓗᒥ ᐅᖓᓯᑦᑕᖃᕐᒪᑕ ᓄᓇᓕᓐᓂᒃ, ᐊᒻᒪᓗ ᐊᕐᓀᑦ ᐃᓄᐃᑦ ᐅᔭᕋᕐᓂᐊᕕᓕᐊᕐᐸᓱᑎᒃ ᐱᓇᓱᑦᑎᑖᕆᔭᐅᑦᓱᑎᒃ ᐅᔭᕋᕐᓂᐊᕕᓐᓄᑦ. ᑭᓯᐊᓂ, ᑕᒪᓐᓇ ᐱᖏᓐᓇᐅᑎᒃ ᐃᓱᒪᒋᔭᐅᒋᐊᖃᕐᒥᔪᖅ ᐊᓯᖏᑦ ᐅᔭᕋᕐᓂᐊᑏᑦ ᕿᓂᕐᑐᑦ ᓄᓇᕕᐅᑉ ᓄᓇᖁᑎᖓᓂ ᓄᓇᓕᖏᑦᑕ ᓴᓂᖏᓐᓅᖃᑐᐃᓐᓇᕆᐊᓖᑦ ᓯᕗᓂᕐᒥ ᐊᑯᓂᐅᖕᖏᑐᖅ. ᐊᓯᐊ ᐱᓀᓗᑕᖕᖑᑐᐃᓐᓇᕆᐊᖃᕐᒥᔪᖅ ᐃᓄᐃᑦ ᐊᕐᓀᑦ ᐊᑦᑕᓀᑦᑐᒦᒋᐊᖃᕐᓂᖏᑦ ᐅᔭᕋᕐᓂᐊᕕᓐᓂ ᐱᓇᓱᐊᕐᑐᑦ. ᖃᐅᔨᓯᒪᑦᓱᑕᓗ ᐱᓇᓱᑦᑏᑦ ᐅᔭᕋᕐᓂᐊᕕᓐᓂ ᑭᓇ ᓯᕗᓪᓕᐸᐅᓗᓂ ᓄᓕᐊᕐᖄᓚᖓᒻᒪᖔᑦ ᐃᓄᒻᒥᒃ ᐊᕐᓇᒥᒃ ᐱᓇᓱᑦᑎᒥᒃ ᐱᓕᐅᑎᒍᑎᖃᓲᒍᒋᐊᖏᑦ. ᓇᓂᑐᐃᓐᓇᖅ ᐃᓅᖃᑎᒌᓂ ᑕᒪᓐᓇ ᐱᐅᓯᐅᕙᓐᓂᕋᕐᑕᐅᓯᒪᔪᖅ ᐊᖏᕋᑦᓴᐅᖏᓪᓚᕆᑦᑐᖅ. ᐅᔭᕋᕐᓂᐊᑏᑦ ᑲᒥᐸᓃᑦ ᓱᕐᖁᐃᑎᑕᐅᓪᓚᕆᒋᐊᓖᑦ ᓲᓱᑦᓴᓂᖃᕆᐊᖃᕐᓂᖏᓐᓂᒃ ᐃᓘᓐᓇᖏᓐᓂᒃ ᐱᓇᓱᑦᑎᓕᒫᓂᒃ, ᐊᒻᒪᓗ ᑌᒣᓘᕐᓂᖅ ᓄᕐᖃᖓᑎᑕᐅᓪᓚᕆᒋᐊᖃᕐᓱᓂ ᓲᓱᒋᔭᐅᒋᐊᖃᕐᒪᑕ ᐃᓄᐃᑦ ᐊᕐᓀᑦ ᐱᓗᑲᕝᕕᐅᒐᓱᐊᕐᐸᒍᓐᓀᓗᑎᒃ. ᑖᒃᑯᐊ ᐊᕐᓀᑦ ᐃᓚᓖᑦ ᐊᒻᒪᓗ ᕿᑐᕐᖓᖃᕐᓱᑎᒃ ᑲᒪᒋᒋᐊᓕᒥᓂᒃ; ᐊᓇᓇᒋᔭᐅᔪᑦ, ᐊᖓᔪᒋᔭᐅᔪᑦ ᓄᑲᕆᔭᐅᔪᑦ, ᐊᑦᓴᒋᔭᐅᔪᑦ ᐊᔭᒋᔭᐅᔪᑦ, ᐊᒻᒪᓗ ᑲᒪᔨᒋᔭᐅᓂᕐᒥᓄᑦ ᐃᓚᐅᑎᑕᐅᑦᓱᑎᒃ ᓄᓇᓕᒥᓄᑦ. ᐊᑦᔨᒌᖕᖏᑐᑦ ᐱᖏᓐᓇᑐᒦᒍᑎᒋᕙᑦᑕᖏᑦ ᐋᕐᓀᑦ ᐃᓚᖃᑐᐃᓐᓇᕆᐊᖃᕐᒥᔪᑦ ᐅᔭᕋᕐᓂᐊᕕᓐᓂ ᐱᓇᓱᐊᕐᑐᓂᒃ ᐊᕐᓇᓂᒃ ᐃᓄᓐᓂᒃ ᐱᓇᓱᑦᑏᑦ ᐊᖑᑎᕙᓪᓘᒪᑕ ᐃᓕᓴᕐᓯᒪᑦᓯᐊᖏᑦᑐᕙᓪᓘᓱᑎᒃ, ᐊᒻᒪᓗ ᐊᕐᓀᑦ ᐱᓇᓱᑦᑏᑦ ᐃᑭᓐᓂᓴᒻᒪᕆᐅᑦᓱᑎᒃ ᐅᔭᕋᕐᓂᐊᕕᓐᓂ. ᐊᕐᓱᕈᑦᑎᑕᐅᓯᓇᐅᓂᖏᑦ ᐃᑭᓐᓂᓴᐅᓂᕐᒥᓄᑦ ᐱᑦᓯᐊᖏᑦᑑᕕᐅᒍᓐᓇᓚᕿᐅᑎᐅᒍᓐᓇᒥᔪᑦ. ᑌᒣᑦᑐᐃᑦ ᓱᓇᐅᓪᓗᐊᑑᔮᖕᖏᑑᒐᓗᐊᑦ ᐱᓇᓱᕝᕕᓂ ᑭᓯᐊᓂ ᑐᓴᐅᒪᒋᐊᖃᕐᓂᕗᑦ ᑖᒃᑯᓂᖓ ᐱᒻᒪᕆᐅᕗᖅ. ᐅᔭᕋᕐᓂᐊᑏᑦ ᑲᒥᐸᓃᑦ ᐊᖏᔪᕐᓛᓘᒻᒪᑕ ᓯᓚᕐᔪᐊᒥᐅᑎᒍᑦ ᐃᓕᐅᕐᖃᓯᒪᓂᖃᕐᓱᑎᒃ ᐊᒻᒪᓗ ᑐᓴᕐᑕᐅᑎᑦᓯᑌᓕᒍᑎᖃᕋᔭᕐᑐᑦ ᖁᓄᔪᕐᓂᐊᑐᖃᕋᓗᐊᕐᐸᑦ, ᐆᑦᑑᑎᒋᓗᒍ, ᐱᓇᓱᕝᕕᒥᓃᒐᒥᐅᓐᓃᑦ ᐅᖃᐅᓯᕆᔭᐅᕙᓐᓂᒥᓂᒃ ᐱᒻᒪᕆᑦᑎᑐᑦ ᓱᒃᑯᑕᐅᑎᑦᓯᑌᓕᒍᑎᑦᓴᖃᕋᒥᒃ. ᓴᑐᕐᕖᑯᓐᓂ ᐊᒥᓲᒻᒥᔪᑦ ᖃᐅᔨᒪᔪᑦ ᐃᓱᒫᓘᑕᐅᕙᑦᑐᓂᒃ ᐃᓄᓐᓄᑦ ᐱᓇᓱᑦᑎᓄᑦ ᐅᔭᕋᕐᓂᐊᕕᓐᓂ ᖃᓄᐃᓘᕐᑕᐅᕙᓐᓂᖏᓐᓂᒃ ᐃᓄᑐᐃᓐᓇᐅᖏᑦᑐᓄᑦ ᐱᓇᓱᑦᑎᓄᑦ.

ᑐᓴᐅᒪᔭᐅᕙᑦᑐᑦ ᐊᒥᓱᑦ ᐃᓄᐃᑦ ᐱᓇᓱᒐᕐᒥᓂᒃ ᓄᕐᖃᓚᕿᔭᐅᕙᓐᓂᖏᑦ ᐅᔭᕋᕐᓂᐊᕕᓐᓂ ᐃᓕᒃᑰᑎᑕᐅᓂᕐᒥᓄᑦ ᓱᓇᑦᓴᔭᐅᓂᖏᑦ ᐃᑉᐱᒋᔭᐅᑦᓱᑎᒃ ᑕᒪᑐᒥᖓᓗ ᐊᕐᓱᕈᕈᑎᖃᕐᐸᓱᑎᒃ. ᑌᒣᒻᒪᑦ ᕿᓄᒍᑎᖃᕐᑐᒍᑦ ᓄᐃᑕᐅᖁᔨᑦᓱᑕ ᐅᓐᓂᓗᕝᕕᒥᒃ ᑭᒡᒐᑐᓚᖓᔪᒥᒃ ᐃᓄᓐᓂᒃ ᐱᓇᓱᑦᑎᓂᒃ. ᐅᓐᓂᓗᕝᕕᒃ ᓯᓚᑖᓃᒐᔭᕐᑐᖅ ᐊᒻᒪᓗ ᑭᓇᒃᑯᓄᓘᓐᓃᑦ ᐃᓚᐅᕕᖃᕈᓐᓀᓗᓂ ᐅᖃᐅᑎᔭᐅᔨᐅᓗᓂ ᐅᓐᓂᓗᒍᑎᒥᒃ ᐊᒻᒪᓗ ᖃᐅᔨᓴᕐᑕᐅᑎᑦᓯᔨᐅᓗᓂ ᐅᓐᓂᓗᒍᑕᐅᔪᓂᒃ. ᐅᓐᓂᓗᕝᕕᒃ ᓄᐃᑕᐅᒋᐊᓕᒃ ᐅᖑᒪᑦᓯᔨᐅᓚᖓᑎᓪᓗᒍ ᐃᓄᓐᓂᒃ ᐊᕐᓇᓂᒃ, ᓂᐱᖃᑦᓯᐊᕈᑎᖃᖃᑦᑕᓂᐊᕐᒪᑕ ᐅᔭᕋᕐᓂᐊᕖᑦ ᐊᖏᔪᕐᓓᑦ ᓵᖏᓐᓃᒐᓗᐊᕈᑎᒃ, ᐊᒻᒪᓗ ᐃᓄᓐᓂᒃ ᓂᐱᖃᕐᑎᓯᔨᐅᓗᓂ ᓈᒻᒪᖏᑦᑐᓕᕕᐅᔪᓂᒃ ᓱᓇᑦᓴᔭᐅᓂᖏᑦ ᐃᑉᐱᒋᔭᐅᑦᓱᑎᒃ ᐱᓇᓱᕝᕕᐅᑉ ᐃᓗᐊᓂ ᐊᒻᒪᓗ ᐊᑦᑕᓀᑦᑐᒦᒋᐊᖃᕐᓱᑎᒃ ᐱᖏᓐᓇᕆᐊᖃᕋᑎᓗ ᐊᒻᒪᓗ ᓄᓇᓕᒥᐅᑦ ᐅᔭᕋᕐᓂᐊᕕᓐᓂᒃ ᖃᓂᑕᓖᑦ.

ᐊᓯᖓᑎᒍᑦ ᐃᓅᖃᑎᒌᓂ ᐃᓱᐃᓪᓕᖓᕙᑦᑐᑦ ᖁᓛᓂ ᐅᖃᕐᑌᑦ, ᓴᑐᕐᕖᑯᑦ ᐃᒣᒋᐊᓖᓚᒍᑎᓕᐅᕐᓯᒪᒻᒥᔪᑦ ᐱᑦᔪᑎᒋᑦᓱᒍ ᐊᕙᑎᒃ ᐃᓘᓐᓈᒍᑦ. ᓄᓇᕕᒻᒥ ᐸᕐᓀᒍᑎᒃ ᐅᖃᐅᓯᕐᑕᖃᖕᖏᒪᑦ ᐊᕙᑎᐅᑉ ᐅᖑᒪᔭᐅᓂᖓᓂᒃ ᐊᒻᒪᓗ ᓴᑐᕐᕖᑯᑦ ᐃᓂᑖᕐᑕᐅᖁᔨᑦᓱᑎᒃ ᑖᑦᓱᒥᖓ ᓄᓇᕕᒻᒥ ᐸᕐᓀᒍᑎᐅᑉ ᐊᓪᓚᓯᒪᔪᕐᑕᖏᓐᓄᑦ. ᓄᐃᑕᐅᖁᔨᓯᒪᑦᓱᑎᓪᓗ ᐱᓇᓱᕝᕖᑦ ᑲᑐᑦᔨᖃᑎᒌᕝᕕᖓᓂᒃ, ᐃᑉᐱᒍᓱᑦᑎᐅᒐᔭᕐᑐᒥᒃ ᐊᕙᑎᐅᑉ ᐅᖑᒪᔭᐅᓂᖓᓂᒃ ᐃᓘᓐᓈᒍᑦ. ᑐᑭᓯᓇᕐᑐᖅ ᐊᒥᓲᕙᓐᓂᖏᑦᑕ ᐱᓇᓱᕝᕖᑦ ᑲᒪᒋᔭᖃᓲᑦ ᐊᕙᑎᒧᐊᖓᔪᓂᒃ ᐃᓱᐃᓪᓕᖓᔪᓂᒃ ᐆᑦᑑᑎᒋᑦᓱᒍ ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᐃᓄᓐᓄᐊᖓᔪᓂᓪᓗ ᑮᓇᐅᔭᕐᑖᓲᒍᑦᓱᓂ ᐱᓇᓱᒐᕐᓄᑦ ᐊᕙᑎᒧᐊᖓᔪᓄᑦ. ᑭᓯᐊᓂ ᐃᒻᒥᒎᕐᑐᒥᒃ ᑎᒥᖃᖕᖏᑐᖅ ᑲᒪᔪᑦᓴᒥᒃ ᐃᓱᐃᓪᓕᖓᕙᑦᑐᓂᒃ ᐊᕙᑎᐅᑉ ᓄᓇᕕᒻᒥ ᐅᖑᒪᔭᐅᓂᖓᓄᑦ. ᐱᑕᓕᐅᒐᓗᐊᖅ ᐊᑕᐅᓯᕐᒥᒃ ᐊᑯᑭᑦᑐᒥ ᐊᑎᓕᒻᒥᒃ ᐊᕙᑕᕐᒥᒃ, ᑭᒡᒐᑐᕐᑎᐅᓱᓂ ᐱᒻᒪᕆᐅᓂᖓᓄᑦ ᐊᕙᑎᐅᑉ ᐅᖑᒪᔭᐅᒋᐊᖃᕐᓂᖓᓄᑦ ᐅᔭᕋᕐᓂᐊᑎᓄᑦ ᓱᒃᑯᑕᐅᑦᑌᓕᑎᑦᓱᒍ ᐊᒻᒪᓗ ᑲᕙᒪᓄᑦ ᑐᕌᒐᑐᐊᓕᓐᓄᑦ ᐱᓇᓱᐊᕐᑕᖏᑦᑕ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᓱᑎᒃ.

ᐸᕐᓇᓯᒪᐅᑎᒃ ᑐᑭᓯᓂᐊᕐᓂᐅᑉ ᐱᕙᓪᓕᐊᓂᖓ ᐱᒻᒪᕆᑦᑕᖓ ᓄᓇᕕᒻᒥ ᐸᕐᓇᓯᒪᐅᑎᐅᑉ ᖃᐅᔨᒪᔭᐅᒋᐊᓕᓐᓂᒃ ᐱᑕᖃᕐᓂᖓ. ᐅᖃᕐᑕᐅᓚᐅᑯᒻᒥᒪᑦ, ᓴᑐᕐᕖᑯᑦ ᑖᒃᑯᓂᖓ ᓯᑯᓴᔭᓂᒃ ᕿᒥᕐᕈᓚᐅᔫᑦ ᑭᖑᓪᓕᐹᒥ ᑲᑎᒪᓂᑦᑎᓂ. ᐊᒥᓱᓄᑦ ᑖᒃᑯᐊ ᐊᑐᐊᕆᐊᑑᒍᕙᑦᑐᑦ ᐊᒻᒪᓗ ᖃᐅᔨᒍᒪᓪᓚᕆᑦᑕᓄᑦ ᕿᒥᕐᕈᑕᐅᔪᑦᓴᐅᓱᑎᒃ ᑐᑭᓯᔭᐅᑦᓯᐊᕈᒪᒍᑎᒃ ᐊᒻᒪᓗ ᐊᑐᐊᕐᑕᐅᓯᐊᕐᓗᑎᒃ. ᐊᒥᓱᓄᑦ ᐊᑐᐊᕐᑕᐅᓯᒪᔪᑦᓴᐅᓕᕐᑑᒐᓗᐊᑦ ᑭᓯᐊᓂ ᐊᒥᓱᓄᑦ ᐃᓄᓐᓄᑦ ᐊᑐᐊᕆᐊᒥᒃ ᐱᔭᕆᐊᑐᒋᔭᐅᒍᓀᑦ ᐃᑦᓯᕙᒍᑎᒋᔭᐅᒋᐊᒥᒃ ᐊᑐᐊᒉᑦ ᐃᓘᓐᓇᑎᒃ ᐊᑐᐊᕐᑕᐅᓯᐊᓚᖓᓗᑎᒃ. ᓴᑐᕐᕖᑯᓐᓄᑦ, ᐅᓪᓗᓕᒫᖅ ᕿᒥᕐᕈᔭᐅᓚᐅᔫᑦ ᓵᑉᑕᖁᑎᖏᑦ ᑲᑎᒪᓂᕗᑦ ᑲᔪᓯᓂᖃᕐᑎᓗᒍ. ᐊᒻᒪᓗ ᓱᓕ ᐊᓯᒋᐊᓪᓚᖏᓐᓂᒃ ᕿᒥᕐᕈᕆᐊᙯᓐᓈᓱᑕ. ᖃᐅᔨᒪᓂᖅ, ᑐᓴᐅᒪᓂᖃᑦᓯᐊᕈᒪᒧᑦ ᑫᓪᓗᑐᕐᑕᐅᓯᐊᕆᐊᓕᒃ ᐃᓘᓐᓀᓂ ᓄᓇᓕᓐᓂ. ᑕᒪᓐᓇ ᐃᓱᒪᒋᓗᒍ, ᐱᒻᒪᕆᐅᕗᖅ ᑐᓴᕐᑎᓯᒋᐊᒥᒃ ᐃᓄᓐᓂᒃ ᐱᕙᓪᓕᐊᔭᐅᔪᓂᒃ ᑐᓴᕐᑎᒋᐊᕐᐸᓗᒋᑦ ᓄᐃᑎᓗᒋᓪᓗ ᖃᐅᔨᒪᓂᐊᕐᑕᖏᓐᓂᒃ ᐁᑦᑐᑐᕐᐸᓗᒋᑦ ᑐᑭᓯᑎᑦᓯᒋᐊᕐᓂᓄᑦ ᑲᑎᒪᑎᑦᓯᓂᑎᒍᑦ.

ᑐᑭᓯᑎᑦᓯᓂᕐᓄᑦ ᑲᑎᒪᑎᑦᓯᓃᑦ ᐃᓕᑦᓯᑫᒍᑕᐅᖃᑦᑕᓂᐊᕐᒪᑕ ᐃᓄᓐᓂᒃ ᓄᓇᕕᒻᒥ ᐸᕐᓀᒍᑎᓄᐊᖓᔪᓂᒃ, ᐅᖃᐅᓯᖃᕐᕕᐅᒪᑕ ᐃᓕᓴᕐᓂᒧᐊᖓᔪᓂᒃ ᐊᒻᒪᓗ ᐃᓱᒫᓘᑎᓂᒃ ᐃᓕᓴᕐᓂᒧᐊᖓᔪᓄᑦ. ᖃᐅᔨᒪᓕᕐᑕᑎᓐᓄᑦ ᐃᓚᒋᔭᐅᑎᓪᓗᒍ ᓄᓇᕕᒻᒥ ᐸᕐᓀᒍᑎᒥ, ᐃᑉᐱᒍᓱᓚᐅᔪᒻᒥᔪᒍᑦ ᑭᖕᖒᒪᓇᓕᕆᐊᖓᓂᒃ ᖃᐅᔨᒪᓂᕐᑖᕆᐊᖃᓕᕐᓂᐅᑉ ᐅᔭᕋᕐᓂᐊᓂᕐᓄᐊᖓᔪᓂᒃ ᐱᓗᐊᕐᑐᒥᒃ. ᖃᓄᖏᒃᑯᐊ ᐃᓄᐃᑦ ᐃᓕᑦᓯᕙᑦᑐᑦ ᐅᔭᕋᕐᓂᐊᕕᓐᓄᐊᖓᔪᓂᒃ ᐆᑦᑑᑎᒋᓗᒍ? ᐊᑦᔨᒌᖕᖏᓂᖃᕐᒪᓃᒃ ᖃᐅᔨᒐᓱᐊᕐᕕᖃᕐᓂᖅ ᐊᒻᒪᓗ ᖃᐅᔨᔭᐅᓯᒪᔪᓂᒃ ᑲᒪᒍᑎᖃᓪᓚᕆᓐᓂᖅ, ᖃᓄᓪᓗᐊᑎᒋᒃ ᖃᐅᔨᓴᕐᓂᖃᓪᓚᕆᑉᐸᐸ, ᐊᒻᒪᓗ ᓱᓇᓂᒃ ᐊᖏᐅᑎᒍᑎᖃᕐᐸᐸᑦ ᐅᔭᕋᕐᓂᐊᕖᑦ ᓄᓇᓕᓐᓂᒃ, ᐆᑦᑑᑎᒋᑦᓱᒋᑦ ᐃᓗᓕᕆᔭᐅᔪᓄᑦ ᐅᔭᕋᕐᓂᐊᕕᒻᒥᒃ ᐅᔮᖕᑲᓚᓐᒥᒃ ᐊᖏᖃᑎᖃᕈᑎᐅᑉ? ᑖᒃᑯᐊ ᑲᒥᐸᓃᑦ ᓇᓃᑦᑐᑦ, ᐊᒻᒪᓗ ᑭᓇᒃᑰᕙᑦ ᑲᒥᐸᓃᑦ ᐱᓇᓱᐊᕐᕕᖃᑐᐃᓐᓇᕆᐊᓖᑦ ᓄᓇᕕᒻᒥᒃ? ᖃᓄᖅ ᐅᔭᕋᕐᓂᐊᑕᖏᑦ ᐊᑐᕐᑕᐅᓲᑦ, ᓱᓇᓂᒃ ᐱᓇᓱᐊᕈᑎᖃᕐᐸᑐᑦ ᐅᔭᕋᕐᑖᒥᓂᒃ ᓇᕝᕚᑕᒥᓂᒃ ᐳᑯᒍᑎᖃᕐᓱᑎᒃ ᐊᒻᒪᓗ ᐊᓯᖏᑦ; ᑐᑭᓯᐅᑎᑦᓴᖃᑦᓯᐊᖏᑦᑐᑦ ᐃᓄᐃᑦ ᖃᐅᔨᒪᓪᓚᕆᓂᕐᑖᕈᑎᑦᓴᒥᓂᒃ ᐃᓱᐃᓪᓕᖓᓲᓂᒃ ᓇᔪᕐᑕᒥᓂ ᐊᒻᒪᓗ ᑐᑭᓯᒪᑦᓯᐊᓗᑎᒃ ᑖᒃᑯᓂᖓ ᑕᑯᓐᓈᐸᑦᑕᒥᓂᒃ ᐅᖃᐅᓯᖃᓪᓚᕆᒍᓐᓇᓯᐅᑎᑦᓴᒥᓂᒃ. ᐊᒥᓲᕙᓕᕐᒪᑕ ᐅᔭᕋᕐᓂᐊᓂᕐᓂᒃ ᐱᓇᓱᐊᕈᑎᓖᑦ ᑕᕐᕋᓕᐊᕈᑎᖃᕋᓱᐊᕐᐸᓕᕐᑐᑦ ᐅᓪᓗᒥ ᖃᐅᔨᒪᓂᖅ ᐅᔭᕋᕐᓂᐊᓂᕐᓄᐊᖓᔪᓂᒃ ᐃᓕᐅᕐᖃᑕᐅᓪᓚᕆᒋᐊᖃᓕᕐᑐᖅ ᓄᓇᓕᓐᓄᑦ ᑐᑭᓯᒪᑦᓯᐊᓂᐊᕐᒪᑕ.

ᐅᑉᐱᕆᔭᖃᕐᑐᖓ ᑕᒪᓐᓇ ᑕᐅᕐᓰᖃᑎᒌᒍᑎᖃᕐᓂᖅ ᐅᕝᕙᓘᓐᓃᑦ ᑐᓴᖃᑦᑕᐅᑎᒍᑎᖃᕐᓂᖅ ᐃᓱᒪᒋᔭᑦᑎᓂᒃ ᓇᒧᖕᖓᕆᐊᕐᑐᓴᐅᒻᒪᖔᑕ ᓇᒻᒥᓂᕗᑦ ᐋᕐᕿᓱᐃᓯᒪᐅᑎᕗᑦ ᐱᕙᓪᓕᐊᓂᓕᕆᓂᕐᓄᑦ ᑕᕐᕋᒥ ᐱᐅᔫᒐᔭᕆᐊᖓ ᐊᒻᒪᓗ ᑖᒃᑯᓂᖓᑦᓭᓇᖅ ᑐᕌᒐᓱᐊᕈᑕᐅᓚᕿᐅᑕᐅᒐᔭᕆᐊᖓ. ᓂᕈᐊᕐᑕᐅᓯᒪᔪᑦ ᓯᕗᓕᕐᑏᑦ ᑲᒪᒋᔭᖃᕐᒥᒪᑕ ᓯᕗᒧᐊᑦᑎᓯᓂᕐᒥᒃ ᑌᒣᑦᑐᑎᒎᕐᑐᓂᒃ ᐋᕐᕿᓯᒪᑎᑦᓯᐅᑎᓂᒃ ᒪᓕᑦᑎᓯᑦᓱᑎᒃ, ᐱᒻᒪᕆᐅᕗᖅ ᓄᓇᓕᓐᓂ, ᐃᓄᐃᑦ ᑖᒃᑯᓂᖓ ᐅᖃᐅᓯᖃᕐᐸᖁᔭᐅᓗᑎᒃ ᑫᓪᓗᑐᕐᑕᐅᔪᑦᓴᐅᕗᑦ. ᖃᐅᔨᒪᔭᐅᒋᐊᓕᓐᓂᒃ ᖃᐅᔨᒪᓂᖅ ᓱᔪᖃᓕᕐᒪᖔᑦ ᐱᐅᔫᒻᒪᑦ. ᐱᐅᔫᒐᔭᕐᑐᖅ ᓄᓇᓖᑦ ᑲᒪᖃᑕᐅᕙᑉᐸᑕ ᑫᓪᓗᑐᕐᑕᐅᕙᑉᐸᑕ ᐊᒻᒪᓗ ᑭᓇᑐᐃᓐᓇᑯᑦ ᐃᓕᑦᓯᒋᐊᓪᓚᕈᒪᔪᑦ ᑯᐯᒻᒥ ᒪᑭᑕᒐᓱᐊᕈᑎᓕᕆᓂᕐᓂ ᐋᕐᕿᓱᐃᓯᒪᐅᑎᓂᒃ, ᐅᔭᕋᕐᓂᐊᓂᕐᓂᒃ ᐃᓘᓐᓈᒍᑦ, ᐊᒻᒪᓗ ᐊᕙᑎᒥᒃ, ᑫᓪᓗᑐᕐᑕᐅᔪᑦᓴᐅᕗᑦ ᑲᑎᒍᑎᖃᕐᐸᒍᑎᒃ ᑐᑭᓯᑎᑦᓯᒋᐊᕐᓂᓃᖃᑎᒌᓪᓗᑎᒃ ᐊᒻᒪᓗ ᑖᒃᑯᓂᖓ ᐅᖃᐅᓯᖃᕐᐸᓗᑎᒃ ᓄᓇᓕᒥᓂ.

ᑭᖑᓪᓕᐹᒥ, ᐊᐱᕐᓲᑎᒃ ᓱᓇᓂᒃ ᐱᓚᕿᒍᒪᒻᒪᖔᑦᑕ ᑕᕝᕙᖓ ᑲᑎᒪᓂᕐᒥ ᐊᐱᕐᓲᑎᑦᓯᐊᒍᕗᑦ ᐃᓘᓐᓀᓄᑦ ᖃᐅᔨᒐᓱᐊᕐᑕᐅᒋᐊᖃᕐᓱᓂ. ᐸᕐᓇᓯᒪᐅᑎᒃ/ᓄᓇᕕᐅᑉ ᐸᕐᓇᓯᒪᐅᑎᐅᑉ ᐊᑐᐊᕋᑦᓴᖁᑎᖏᓐᓂᒃ ᐅᖃᐅᓯᖃᓪᓚᕆᑦᓯᒪᒌᕐᕿᑕ ᑭᖕᖒᒪᓇᕐᑐᓂᒃ ᓄᓇᕕᒻᒥ ᑲᒪᒋᔭᐅᑦᓯᐊᓯᒪᕋᑕᖕᖏᑲᓗᐊᕐᐸᑕ? ᐃᓪᓗᖃᕐᓂᖅ, ᐃᓕᓴᕐᓂᖅ, ᐅᕕᒃᑫᑦ ᐅᖑᒪᔭᐅᓂᖏᑦ ᑲᒃᑲᓛᓄᑦ, ᐃᓅᖃᑎᒌᓐᓂᓂ ᐃᓱᐃᓪᓕᖓᕙᑦᑐᑦ ᐊᒻᒪᓗ ᐱᓀᓗᑌᑦ, ᐃᑯᒪᐅᑎᖃᕆᐊᖃᕐᓂᒧᑦ ᑭᖕᖒᒪᓇᕐᑐᑦ, ᐃᖏᕐᕋᐅᑏᑦ ᐊᕐᖁᑎᖏᑦ ᐊᒻᒪᓗ ᐊᓯᖏᑦ? ᑕᒪᑐᒥᖓ ᐱᕕᑦᓴᖃᕐᕕᖃᕆᐊᕈᓐᓇᑐᕆᔪᖓ ᓄᓇᕕᒻᒥᐅᑦ ᐃᓄᐃᑦ ᑲᒪᒋᔭᐅᖁᔭᒥᓂᒃ ᓇᓗᓀᕐᑐᐃᑎᑕᐅᒋᐊᕐᑎᓗᒋᑦ ᐅᔭᕋᕐᓂᐊᓂᕐᒧᐊᖓᔪᓂᒃ ᓄᐃᑎᕐᓗᒋᑦ ᐅᔭᕋᕐᓂᐊᓂᕐᓄᐊᖓᔪᑦ ᒪᓕᒉᑦ, ᐊᓪᓓᓕ ᑯᔩᑦ ᑌᒣᓯᒪᒌᕐᒪᑕ ᐊᒻᒪᓗ ᓄᓇᕗᒻᒥᐅᑦ ᑌᒣᓯᒪᒌᕐᓱᑎᒃ. ᐆᑦᑑᑎᒋᑦᓱᒍ ᐊᐱᕐᓲᑕᐅᕙᑦᑐᖅ ᓄᓇᕕᒻᒥ ᔪᔦᓂᐊᒻᓂᐊᓂᖅ, ᓄᓇᖁᑎᑦᑎᓂ ᐊᖏᑐᐃᓐᓇᓚᖓᕕᑕ ᕿᓈᔭᕐᕕᐅᒐᓗᐊᕐᐸᑦ ᔪᔦᓂᐊᒻᒥᒃ (uranium) ᖃᓄᐃᒋᒍᓐᓀᓗᒍ, ᐅᕝᕙᓘᓐᓃᑦ ᓄᓇᖁᑎᑦᑎᓂᒃ ᑲᒪᒋᔭᐅᖁᔨᓂᐊᖕᖏᓚᒍᑦ ᕿᓈᔭᕐᕕᐅᖁᒍᓐᓀᓗᒍ ᔪᔦᓂᐊᒻᒥᒃ? ᑖᒃᑯᓂᖓ ᐅᖃᐅᓯᖃᕆᐊᖃᕐᑐᒍᑦ ᐊᒻᒪᓗ ᐊᓯᖏᓐᓂᒃ ᓄᓇᓕᓐᓂ.

ᑭᓯᐊᓂ ᑌᒣᓚᖓᒍᑦᑕ ᐅᒃᑯᐃᓯᒋᐊᖃᕐᑐᒍᑦ ᐅᖃᐅᓯᕆᔭᐅᓂᖏᓐᓂᒃ ᐊᒻᒪᓗ ᑭᐅᒪᐅᑕᐅᓂᖏᓐᓂᒃ ᑌᒣᑦᑐᓂᒃ ᐊᐱᕐᓲᑎᓂᒃ ᑭᐅᒍᑎᑦᓭᑦ. ᐅᔭᕋᕐᓂᐊᓂᕐᓄᑦ ᒪᓕᒐᖅ ᐋᕐᕿᓯᒪᒍᑎᖃᕆᐊᓕᒃ ᐃᓚᐅᑎᓪᓗᒋᑦ ᐃᓄᐃᑦ ᓄᐃᓗᒋᑦ ᐅᒃᑯᐃᖔᕐᑎᓯᑦᓯᐊᕖᑦ ᐅᖃᐅᓯᖃᕐᓃᑦ. ᖏᑉᐸᑦ, ᐅᔭᕋᕐᓂᐊᓂᕐᓄᑦ ᒪᓕᒐᖅ ᐊᓪᓚᑕᐅᔪᖅ ᐃᓄᐃᑦ ᐃᓚᐅᑎᓐᓇᒋᑦ ᐃᓱᒫᓗᓐᓇᓚᖓᔪᖅ ᓄᐃᑕᐅᑐᐃᓐᓇᕆᐊᖃᓚᖓᒻᒪᑦ ᑖᒃᑯᑐᐊᑦ ᑲᒪᒋᔭᐅᖁᔭᖏᑦ ᐊᑕᐅᓰᑦ ᐱᓇᓱᕝᕖᑦ ᐃᓄᐃᑦ ᐃᓚᒌᕝᕕᖏᑦ ᑐᑭᑖᕈᑎᓂᒃ ᓄᐃᑦᓯᒍᑎᒋᓚᕿᔭᖏᓐᓂ. ᐆᑦᑑᑎᐅᒍᓐᓇᐳᑦ ᒪᑭᕝᕕᒃ ᑯᐊᐳᔦᓴᓐ, ᐱᓇᓱᐊᕈᑎᓕᒃ ᒪᑭᑕᒐᓱᐊᕈᑎᑦᓴᑕᕐᓂᓄᑦ ᓄᓇᕕᒻᒥ ᓄᓇᓕᓕᒫᒍᑎᓪᓗᒍ. ᒪᑭᕝᕕᑯᑦ ᑲᒪᒋᔭᖃᕈᒪᒻᒪᑕ ᐅᔭᕋᕐᓂᐊᓂᕐᓂᒃ ᐊᒻᒪᓗ ᐊᖏᖃᑎᒌᒍᑎᓂᒃ ᓄᐃᑦᓯᖃᑎᖃᕐᐸᓱᑎᒃ ᐅᔭᕋᕐᓂᐊᓂᕐᓂᒃ ᑲᒥᐸᓂᐅᒍᑎᓕᓐᓂᒃ ᐱᑦᔪᑎᒋᑦᓱᒋᑦ ᒪᑭᑕᒐᓱᐊᕐᓂᑎᒍᑦ ᑲᒪᒍᑦᔨᒍᒪᐅᑎᖏᑦ ᓄᓇᕕᒻᒥᒃ, ᑌᒣᓕᖓᔪᒥᒃ ᐋᕐᖀᕙᑦᑐᑦ ᐱᐅᓂᕐᐹᖁᑎᒥᑎᒍᑦ ᐋᕐᖀᖃᑎᖃᕐᓱᑎᒃ. ᐃᓱᒪᒋᔭᐅᑎᓐᓇᒋᑦ ᖃᓄᖅ ᐃᓄᐃᑦ ᐅᖃᐅᓯᑦᓴᖁᑎᖏᑦ ᔪᔦᓂᐊᒻᑕᕐᑐᓄᐊᖓᔪᓂᒃ ᐅᕝᕙᓘᓐᓃᑦ ᐊᓯᖏᓐᓂᒃ ᖃᓄᑐᐃᓐᓇᖅ ᐱᕙᓪᓕᐊᑎᑕᐅᔪᓂᒃ ᓱᒃᑯᑎᑦᓯᑐᐃᓐᓇᕆᐊᖃᕋᓗᐊᕐᒪᑕ ᐃᓅᖃᑎᒌᑦ ᐊᒻᒪᓗ ᐊᕙᑎ ᖃᓄᐃᓕᖕᖓᓚᕿᓗᒋᑦ. ᐅᔭᕋᕐᓂᐊᓂᕐᓄᑦ ᒪᓕᒐᖅ ᓄᐃᑕᐅᒋᐊᓕᒃ ᐃᓚᐅᑎᓪᓗᒋᑦ ᓄᓇᓕᓐᓂ ᐃᓄᐃᑦ ᐊᕐᖁᑎᒋᓗᒋᑦ ᑐᑭᓯᓇᑦᓯᐊᑐᑦ, ᑐᑭᓯᐅᑎᑦᓴᑖᕐᕕᐅᒍᓐᓇᑐᑦ, ᐅᒃᑯᐃᖔᑦᓯᐊᓗᑎᓗ ᓇᐅᓕᒫᓄᑦ ᐅᖃᐅᓯᖃᕐᓃᑦ.

ᐃᓱᓕᑎᑦᓯᐅᑏᑦ ᖁᓛᓂ ᐅᖃᕐᑕᐅᔪᑦ ᐋᕐᕿᒋᐊᕐᑐᓭᑦ ᓄᐃᑕᐅᓯᒪᔪᑦ ᐃᓚᐅᑎᓪᓗᒋᑦ ᐃᒣᒋᐊᓖᓚᒍᑎᓄᑦ ᐊᒻᒪᓗ ᓄᐃᑕᐅᖁᔭᐅᔪᓄᑦ ᒪᑭᑕᒐᓱᐊᕐᓂᑎᒍᑦ ᐱᕙᓪᓕᖁᑎᑦᓴᑕᖃᓚᖓᑉᐸᑦ, ᐃᓅᖃᑎᒌᑦ ᐱᕙᓪᓕᖁᑎᑦᓴᖏᑦ ᕿᒪᑦᑕᐅᒪᒋᐊᖃᕐᔭᖏᒻᒪᑕ. ᐃᓅᖃᑎᒌᓂ ᐱᓀᓗᑌᑦ ᐃᑉᐱᒋᖕᖏᓯᕐᑐᑕᐅᒋᐊᖃᕐᔭᖏᒻᒪᑕ ᐱᓇᓱᐊᕐᑐᑦ ᓄᓇᓕᓕᒫᓂ ᑮᓇᐅᑦᔭᓴᓚᖓᑦᓱᑎᒃ ᑖᒃᑯᑑᓗᑎᒃ ᓄᓇᓕᕆᒋᐊᖃᑦᔭᖏᒻᒪᑕ. ᑮᓇᐅᑦᔭᑏᑦ ᐅᔭᕋᕐᑕᑐᓄᑦ ᐱᕙᓪᓕᖁᑎᑦᓴᑖᕆᔦᑦ ᐃᓄᐃᑦ ᓄᓇᓕᖏᓐᓄᑦ ᑐᕌᖓᑎᑕᐅᒋᐊᖃᑦᔭᖏᒻᒪᑕ ᐊᑦᓱᐃᓕᒍᑎᐅᓚᖓᑎᓪᓗᒋᑦ ᐱᖁᑎᒻᒪᕆᓐᓄᑦ ᐅᕝᕙᓘᓐᓃᑦ ᐱᐅᓕᓂᐊᒐᕐᑖᓚᕿᐅᑕᐅᓗᑎᒃ. ᐃᓅᖃᑎᒌᓂ ᐱᓀᓗᑌᑦ ᐋᕐᕿᓱᕐᑕᐅᒋᐊᖃᕐᐳᑦ ᐊᑕᐅᑦᓯᑰᕐᑎᑕᐅᓗᑎᒃ ᖏᑐᐊᕐᐸᑕ ᐊᑯᓐᓂᖃᓗᐊᕐᑎᓯᐅᑏᑦ ᐱᑕᓖᑦ ᐊᒻᒪᓗ ᐱᑕᖃᖕᖏᑐᑦ ᓄᐃᕙᓪᓕᐊᑐᐃᓐᓇᓂᐊᕐᒪᑕ. ᐅᔭᕋᕐᓂᐊᓂᕐᓄᑦ ᐱᓇᓱᒐᖅ ᐃᓅᖃᑎᒌᑦ ᒪᑭᑕᒐᓱᐊᕈᑎᑦᓴᖏᑎᒍᑦ ᐱᕙᓪᓕᖁᑖᒍᒋᐊᓖᑦ ᓄᓇᓕᒻᒧᑦ ᐅᕝᕙᓘᓐᓃᑦ ᓄᓇᓕᓐᓄᑦ ᖃᓂᑕᕆᔭᐅᓂᕐᐹᓄᑦ. ᒪᑭᑕᒐᓱᐊᕐᓂᖃᕐᓂᑎᒍᑦ ᐊᑦᓱᐃᓕᓂᖅ ᑭᓪᓕᒥᐅᑕᖃᕐᑎᑕᐅᒋᐊᖃᕐᒪᑦ ᐃᓅᖃᑎᒌᓂᒃ ᑲᒪᒍᑦᔨᓂᕐᓂᒃ.

Lisa Koperqualuk
Saturviit Inuit Women’s Association

Pin It on Pinterest

ᑕᑯᓐᓇᑕᐅᓂᖏᑦ ᓄᓇᕕᒻᒥ ᐸᕐᓀᒍᑎᐅᑉ ᐊᒻᒪᓗ ᐸᕐᓇᓯᒪᐅᑎᐅᑉ