Menu

ᑭᓇᒃᑰᒪᖔᑦᑕ

ᑭᓇᒃᑰᒪᖔᑦᑕ

ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᓄᓇᕕᒻᒥ ᑭᒡᒐᑐᕐᑐᖅ ᐃᓘᓐᓀᓂᒃ ᐃᓄᓐᓂᒃ ᐊᕐᓇᓂᒃ ᓄᓇᕕᒻᒥ ᐅᑭᐅᓕᓐᓂᒃ 16-ᓂᒃ ᐅᖓᑖᓄᓪᓗ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ ᐃᓚᐅᔪᓂᒃ. ᓄᓇᓕᓕᒫᓄᐊᖓᑦᓱᓂ ᖄᖏᕐᓂᑯᓕᐅᕐᑎᐅᒐᓂ ᑎᒥᐅᓂᕐᒥᓄᑦ, ᓴᑐᕐᕖᑦ ᐱᒐᓱᐊᕈᑎᖃᓲᖅ ᓂᐱᖃᕐᑎᓯᒋᐊᖃᕐᓂᒥᓂᒃ ᓄᓇᕕᒻᒥᐅᓂᒃ ᐊᕐᓇᓂᒃ ᐊᒻᒪᓗ ᑭᒡᒐᑐᕈᑎᒋᓗᒋᑦ ᖃᓄᐃᖕᖏᓯᐊᕆᐊᖃᕐᓂᖏᑦ ᐊᒻᒪᓗ ᑲᒪᒋᔭᐅᖁᔭᖏᑦ. ᓴᑐᕐᕖᑦ ᑭᒡᒐᑐᕐᓂᖃᕈᒪᓂᕐᒥᓄᑦ ᑐᓴᐅᒪᑎᑦᓯᒋᐊᓲᑦ ᓄᓇᕕᒻᒥ 14-ᓂ ᓄᓇᓕᓐᓂ ᐊᒻᒪᓗ ᐃᓄᓐᓂᒃ ᐊᕐᓇᓂᒃ ᖃᓪᓗᓈᑦ ᓄᓇᖓᓄᑦ ᓅᑦᓯᒪᔪᓂᒃ. ᑲᑎᒪᔨᖃᕐᑐᒍᑦ ᑭᒡᒐᑐᕐᑎᓂᒃ ᓄᓇᓕᓕᒫᓂ ᓄᓇᕕᒻᒥ ᐊᑦᔨᒌᖕᖏᑐᓂ.

2005 ᐊᐅᔭᖓᓂ, ᐃᓄᐃᑦ ᐊᕐᓀᑦ ᐃᓘᓐᓀᓂ ᓄᓇᕕᒻᒥ ᓄᓇᓕᓐᓂ ᐱᓯᒪᔪᑦ ᐊᒻᒪᓗ ᖃᓪᓗᓈᑦ ᓄᓇᖓᓂ ᑲᑎᓚᐅᕐᓯᒪᔪᑦ ᕿᓚᓗᒐᖅ ᐊᐅᓪᓛᓯᒪᕕᒻᒥ ᐳᕕᕐᓂᑑᑉ ᓴᓂᐊᓂ, ᑖᕙᓃᑦᓱᑎᒃ ᐅᖃᐅᓯᖃᓚᐅᕐᓯᒪᔪᑦ ᐃᓱᐃᓪᓕᖓᐅᑎᐅᕙᑦᑐᓂᒃ ᐃᓱᒪᒋᔭᒥᓂᒃ ᐱᒻᒪᕆᐅᒋᐊᖏᑦ ᓄᓇᓕᒥᓂ: ᕿᑐᕐᖓᒥᓂᒃ ᐱᕈᕐᓭᓯᐊᕐᓂᖅ, ᑲᒃᑲᓛᑦ ᑲᒪᒃᑭᓗᑦᑕᐅᓂᖏᑦ, ᐃᒻᒥᓂᐊᕐᓂᖅ, ᐃᓕᓴᕐᓂᖅ, ᐅᖃᐅᓯᖅ, ᒪᒥᓴᕐᓂᖅ, ᐊᒻᒪᓗ ᐅᖃᐅᓯᒃᑯᑦ ᑎᒥᒃᑯᓗ ᐋᓐᓂᑎᕆᓂᖅ. ᓄᐃᑕᐅᖁᔨᓕᓚᐅᕐᓯᒪᔪᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓂᒃ ᓲᖑᓯᑎᑦᓯᓚᖓᔪᒥᒃ ᓄᓇᕕᒻᒥᐅᑦ ᐊᕐᓀᑦ ᓂᐱᖏᓐᓂᒃ. ᓴᑐᕐᕖᑦ, ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᓄᓇᕕᒻᒥ ᓄᐃᑕᐅᓚᐅᕐᓯᒪᔪᖅ 2006-ᒥ ᑎᓕᔭᐅᒍᑎᖃᕐᓱᓂ ᐊᕐᓀᑦ ᓄᓇᕕᒻᒥ ᑲᒪᒋᔭᐅᖁᓲᖏᓐᓂᒃ. ᓴᑐᕐᕖᑦ ᐱᓇᓱᐊᕈᑦᔨᐅᑎᒋᓚᖓᔭᖓᑕ ᐃᓚᒋᓚᐅᕐᓯᒪᔭᖓ ᐃᕐᓯᓇᕿᕝᕕᖃᕐᓂᓂᒃ ᐱᒋᐊᖃᑦᑖᖃᕐᓂᓂᒃ ᓄᕐᖃᑎᑦᓯᓂᖅ.

ᑎᒥᖁᑎᕗᑦ ᑫᓪᓗᑐᐃᓲᖅ ᐊᕐᓇᓂᒃ ᓈᒻᒪᑐᓂᒃ ᐊᐅᓚᑦᔦᒋᐊᕈᑎᖃᖁᑦᓱᒋᑦ ᐱᐅᓯᐅᒥᑎᑦᓯᒋᐊᕈᑎᒋᓂᐊᕐᑕᒥᓂᒃ ᓇᒻᒥᓂᖅ ᐃᓅᖃᑎᒌᓐᓂᓂ ᐊᒻᒪᓗ ᒪᑭᑕᒐᓱᐊᕐᓂᓂ ᖃᓄᐃᖕᖏᓯᐊᕐᓂᒥᒍᑦ ᐃᑲᔪᕐᓯᐅᑎᒋᓯᐊᕐᑕᖏᓐᓂᒃ. ᐱᕙᓪᓖᒋᐊᕐᑎᐅᓱᓂ ᓄᓇᓕᓕᒫᓂ ᐊᒻᒪᓗ ᐳᔮᕓᓐᓯᒥ ᐱᓇᓱᐊᕈᑦᔨᐅᑎᓂᒃ ᐊᒻᒪᓗ ᑭᒡᒐᑐᕈᑎᓂᒃ ᐱᕙᓪᓖᒋᐊᕐᑎᓯᐅᑎᐅᓚᖓᔪᓂᒃ ᐃᑲᔪᕐᓯᓗᒋᑦ ᐊᕐᓀᑦ, ᑲᒃᑲᓛᑦ ᐊᒻᒪᓗ ᓄᓇᓖᑦ ᖃᓄᐃᖕᖏᓯᐊᕆᐊᖃᕐᓂᒥᑎᒍᑦ.

ᓴᑐᕐᕖᑦ ᑮᓇᐅᔭᖃᕐᑎᓯᓲᑦ ᐃᑲᔪᕐᓯᒪᓲᒍᑦᓱᑎᓪᓗ ᓄᓇᓕᓐᓂ ᐊᕐᓀᑦ ᐃᓚᒌᕝᕕᖏᓐᓂᒃ ᑲᔪᓯᑎᑦᓯᓚᖓᔪᓂᒃ ᓄᓇᓕᓐᓂ ᐱᓇᓱᒐᕐᓂᒃ ᐊᒻᒪᓗ ᓱᖃᑦᓯᑎᑦᓯᐅᑎᓂᒃ. ᑲᔪᓯᑎᑦᓯᓲᑦ ᓄᓇᓕᓕᒫᓂ ᐱᓇᓱᐊᕐᑕᐅᒍᒪᔪᓂᒃ ᐊᒻᒪᓗ ᓱᖃᑦᓯᐅᑕᐅᔪᓂᒃ ᐃᓄᐃᑦ ᐊᕐᓀᑦ ᐃᓱᒫᓘᒋᔭᖏᓐᓄᑦ ᐊᒻᒪᓗ ᑲᒪᒋᒍᒪᔭᖏᓐᓄᑦ. ᓴᑐᕐᕖᑦ ᑭᒡᒐᑐᓲᒍᒻᒥᔪᑦ ᓄᓇᕕᒻᒥ ᐊᕐᓇᓂᒃ ᐊᔪᖀᒋᐊᕐᑎᐅᓂᕐᒥᓄᑦ ᐱᓇᓱᐊᕈᑎᖃᕐᓱᑎᒃ ᓄᓇᓕᓕᒫᓂ, ᑳᓇᑕᒥ ᐊᒻᒪᓗ ᓯᓚᕐᔪᐊᒥ ᑲᒪᒋᔭᐅᓕᑐᐃᓐᓇᑐᓂᒃ.

Pin It on Pinterest

ᑭᓇᒃᑰᒪᖔᑦᑕ