Menu

ᐃᓄᑦᔪᐊᒥ ᑳᑦᑐᓂᒃ ᓂᕆᑎᑦᓯᓂᕐᒧᑦ ᐱᓇᓱᒐᖅ

ᐃᓄᑦᔪᐊᒥ ᑳᑦᑐᓂᒃ ᓂᕆᑎᑦᓯᓂᕐᒧᑦ ᐱᓇᓱᒐᖅ

2018 – ᓯᕆᕕᒃ ᓂᕐᓯᐅᕈᑦᔨᕕᒃ

ᓴᑐᕐᕖᑦ ᐅᐱᒪᒋᔭᖃᕐᐳᑦ ᓴᐳᑦᔨᓯᒪᓕᕐᓂᒥᓂᒃ ᓄᓇᓕᓐᓂ ᑳᑦᑐᓂᒃ ᓂᕐᓯᐅᕕᒻᒥᒃ ᐃᓄᑦᔪᐊᒥ ᐅᒃᑯᐃᑕᐅᓚᐅᕐᓯᒪᑎᓪᓗᒍ 2013-ᒥ. ᐊᕐᕌᒍᓂ 5-ᓂ ᐱᑦᓯᐊᓂᖃᕐᓱᓂ ᐊᒻᒪᓗ ᐱᕈᕐᐸᓕᐊᑦᓯᐊᓱᓂ, ᓄᓇᓕᓐᓂ ᓂᕐᓯᐅᕕᒃ ᐱᒋᐊᕐᐸᓕᐊᓂᖃᓕᕐᒥᔪᖅ ᑐᖓᓕᐊᓂ ᐱᓇᓱᐊᕐᑕᐅᕕᖓᑕ ᐱᕙᓪᓕᐊᑎᑕᐅᓂᖓ: ᐁᐸᔭᓕ 26, 2018-ᒥ, ᖁᕕᐊᓲᑎᒋᔭᐅᓚᐅᔫᖅ ᐅᒃᑯᐃᑕᐅᓪᓚᕆᓐᓂᖓ ᓄᑖᑉ ᐃᖏᕐᕋᓂᖃᓕᕐᑑᑉ ᓂᕐᓯᐅᕕᐅᑉ: ᓯᕆᕕᒃ ᑳᑦᑐᓂᒃ ᓂᕐᓯᐅᕈᑦᔨᕕᒃ.

ᑐᕌᒐᓪᓚᕆᖓ ᓯᕆᕕᒃ ᑳᑦᑐᓂᒃ ᓂᕐᓯᐅᕈᑦᔨᕕᐅᑉ ᒥᑭᓪᓕᑎᕐᓯᒪᑎᑦᓯᒋᐊᕐᓂᖅ ᓂᕆᔭᑦᓭᓘᕐᓂᒥᒃ ᑲᔪᓯᖏᓐᓇᑐᓂᒃ, ᐱᔪᓐᓇᓯᐊᕐᑐᓂᒃ ᐊᒻᒪᓗ ᖃᓄᐃᓕᖕᖓᑕᖕᖏᑐᓂᒃ ᑭᒡᒐᑐᕐᓂᖃᕐᑎᓱᒍ ᐊᑐᐃᓐᓇᐅᖏᓐᓇᑐᓂᒃ ᐃᓄᑦᔪᐊᒥ. ᑌᒣᒍᓐᓇᓯᓯᒪᔪᑦ ᐱᓇᓱᐊᖃᑎᖃᕐᓱᑎᒃ, ᕿᓄᒍᑎᖃᕐᐸᓱᑎᒃ, ᐊᒻᒪᓗ ᐱᓇᓱᐊᕈᑦᔨᕙᑦᓱᑎᒃ, ᐅᑯᐊ ᐃᓚᐅᑎᓪᓗᒋᑦ:

  1. ᐃᓄᓐᓂᒃ ᐊᔪᕐᓴᑐᓂᒃ ᓂᕆᑎᑦᓯᓂᖅ (ᓂᕐᓯᐅᕈᑦᔨᕕᒻᒥ ᐊᒻᒪᓗ ᐅᐃᒪᓇᕐᑐᓯᐅᑎᖃᐅᑎᒥᒃ ᖁᐊᒃᑯᕕᖃᕐᓱᓂ)
  2. ᒪᓂᔨᓯᒪᓂᖅ ᐃᓕᓐᓂᐊᑎᑦᓯᐅᑎᓂᒃ ᐃᓕᒃᑰᑎᕐᑐᑦ ᐃᓄᐃᑦ ᐱᔪᓐᓇᓯᑦᓯᐊᐸᖁᒧᑦ ᐊᒻᒪᓗ ᐱᔪᓐᓇᕆᐊᒥᒃ ᐃᑉᐱᒍᓱᓕᖁᒧᑦ
  3. ᓄᓇᓖᑦ ᑲᒪᖃᑕᐅᓂᖏᑦ ᐊᒻᒪᓗ ᐃᓅᖃᑎᒌᓄᑦ ᐃᓚᐅᑦᓯᐊᕈᓐᓇᑎᑦᓯᕙᓪᓕᐊᓂᖅ

ᐅᓪᓗᒥᒧᑦ 250 ᓂᕆᑎᑕᐅᕙᑦᑐᑦ ᐱᓇᓱᐊᕈᓯᑕᒫᑦ ᐃᓄᑐᙯᑦ (ᐸᔪᑦᑎᐅᑎᓪᓗᒋᑦ ᐃᒻᒥᓂᕿᕐᖃᔭᖕᖏᑐᓂᒃ ᓄᓇᓕᓐᓂ ᐱᓇᓱᐊᕈᑦᔨᔩᑦ) ᐊᒻᒪᓗ ᐱᑕᑦᓯᑐᐃᕙᑦᓱᑎᒃ ᐅᐃᒪᓇᕐᑐᖃᐅᑎᒥᒃ ᖁᐊᒃᑯᕕᒻᒥᒃ ᓂᕆᔭᐅᔪᑦᓴᓂᒃ ᐃᓅᓯᓕᕆᔨᒃᑯᑦ ᑲᒪᒋᓲᖏᓐᓄᑦ, ᐃᒻᒥᓂᕿᕐᖃᔭᖕᖏᑐᓪᓗ ᑲᒪᒋᓲᖏᓐᓄᑦ, SIPPE ᑲᒪᒋᓲᖏᓐᓄᑦ ᐊᒻᒪᓗ ᐃᕐᓂᓱᑦᓰᔩᑦ ᑲᒪᒋᔭᖏᓐᓂᒃ ᑭᒡᒐᑐᕐᑕᒥᓂᒃ ᓂᕿᑖᕐᑎᓯᒍᓐᓇᐸᑦᑎᓗᒋᑦ ᑳᓪᓗᐊᑐᖃᓕᕐᒪᑦ. ᔭᓄᐊᔨ ᐊᒻᒪᓗ ᔪᓓ 2018 ᐊᑯᓐᓂᖓᓂ ᓯᕆᕕᒃ ᓂᕆᒃᑫᓯᒪᔪᖅ 3500-ᓂᒃ ᐴᒍᑕᕐᓂᒃ – ᐅᓄᕐᓯᕙᓪᓕᐊᓯᒪᑦᓱᑎᓪᓗ ᓂᕆᔭᑦᓭᓘᕐᑐᑦ ᐊᕐᕌᒍᐃᑦ ᒪᓕᑦᓱᒋᑦ. ᓄᓇᓕᓐᓄᑦ ᓈᒻᒪᒋᔭᐅᓪᓚᕆᑦᑐᖅ ᑕᒪᓐᓇ. ᓯᕆᕕᒃ ᐱᓇᓱᐊᖃᑎᒋᔭᐅᑦᓯᐊᑐᖅ ᐊᑦᔨᒌᖕᖏᑐᓄᑦ ᓄᓇᓕᓐᓂ ᐃᑲᔪᕐᑎᓄᑦ ᑌᒣᒻᒪᑦ ᓯᕗᓂᕐᒥ ᖃᒻᒥᑯᑦ, ᐱᓇᓱᐊᕐᑕᐅᕙᓪᓕᐊᓚᖓᔪᑦᓴᐅᔪᑦ ᓂᕐᓯᐅᓃᑦ ᐅᓄᕐᓂᓭᑦ ᐃᓄᐃᑦ ᒪᓂᔨᕕᐅᖃᑦᑕᕈᓐᓇᓯᑎᓗᒋᑦ. Sippe ᐊᑐᓲᖅ ᓂᕐᓯᐅᕕᒻᒥᒃ ᐊᕐᓇᓂᒃ ᓄᑕᕋᑦᓴᓕᓐᓂᒃ ᓂᕐᓯᐅᕆᐅᕐᓴᑎᑦᓯᓱᑎᒃ ᐊᒻᒪᓗ ᐊᓇᕐᕋᐅᔨᕙᑦᓱᑎᒃ ᓂᕿᓕᐊᒥᓂᒃ. ᐊᕐᕌᒍᒻᒥᐸᑦ ᐃᓕᓐᓂᐊᑎᑦᓯᓂᕐᓴᐅᒍᒪᓛᓕᕐᑐᒍᑦ ᐃᓚᒋᓗᒋᑦ ᑳᑦᑐᓂᒃ ᓂᕐᓯᐅᕈᑦᔨᕕᒻᒥ ᐱᓇᓱᑦᑎᓂᒃ.

ᓯᕆᕕᐅᑉ ᐱᓇᓱᐊᖃᑎᒋᓲᖏᑦ: ᑖᓐᓇ ᑳᑦᑐᓂᒃ ᓂᕐᓯᐅᕈᑦᔨᕕᒃ ᓄᐃᑕᖕᖏᐸᑦ ᓱᒐᔭᕐᓂᖏᑦᑐᑦ. ᓇᑯᕐᒦᒪᕆᑦᑕᐅᕗᑦ ᐃᓘᓐᓇᑎᒃ ᐃᑲᔪᕐᐸᑐᑦ! ᐃᓚᒌᑦ ᐃᓪᓗᖁᑎᖓ ᐃᑲᔪᕐᓯᒪᒻᒪᕆᑉᐸᑐᖅ ᐊᒻᒪᓗ ᓂᕐᓯᐅᑎᒥᓂᒃ ᐊᑦᑕᑐᕐᑎᓯᖃᑦᑕᓚᐅᔪᑦᓱᓂ ᓇᒻᒥᓂᕐᑖᓚᐅᕐᑎᓇᑕ. ᐊᒥᓱᓂᒃ ᑐᓂᕐᕈᓯᕕᐅᕙᑦᑐᖅ ᑯᐊᐸᒃᑯᓄᑦ/ᓂᐅᕕᕐᕕᒧᑦ ᓄᐊᔭᓐᒧᑦ/ᐱᒋᐅᕐᓴᕕᒻᒧᑦ. ᓄᓇᓖᑦ ᑲᕙᒫᐱᖓ ᐃᓄᑦᔪᐊᒥ ᓴᐳᑦᔨᓯᒪᕙᑦᑐᖅ ᐅᕙᑦᑎᓂᒃ ᑭᓇᓕᒫᒃᑯᑦ ᑭᒡᒐᑐᕐᑕᐅᒍᑎᖏᑎᒍᑦ, ᐃᓪᓗᖃᕐᑎᓯᓂᑎᒍᑦ, ᐊᒻᒪᓗ ᐃᓪᓗᓕᕆᔨᒃᑯᑦ ᓄᑕᐅᓪᓕᑎᕐᑕᐅᑎᓪᓗᒍ ᐊᒻᒪᓗ ᐱᓇᓱᐊᕐᑎᖃᕐᑎᓯᓯᒪᑦᓱᓂ. ᓴᑐᕐᕖᑯᑦ ᑲᔪᓯᑎᑦᓯᔪᑦ ᐃᑲᔪᕐᓯᒪᓂᕐᒥᓂᒃ ᑮᓇᐅᔦᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐊᐅᓚᑕᐅᒋᐊᓕᓐᓄᑦ ᐱᓇᓱᐊᕐᑕᐅᒋᐊᓕᓐᓄᑦ ᐱᓪᓗᑯᒋᐊᓕᑎᒍᑦ. ᐊᑎᕋᖅ ᐊᕐᓀᑦ ᑲᑐᑦᔨᖃᑎᒌᓐᓂᖓ ᐃᓪᓗᖁᑎᒥᓂᒃ ᐊᑦᑕᑐᕐᑎᓯᓂᕐᒥᓄᑦ ᑳᑦᑐᓂᒃ ᓂᕐᓯᐅᕕᐅᑎᑦᓯᓱᑎᒃ.

ᑮᓇᐅᔭᑎᒍᑦ ᓴᐳᑦᔨᓯᒪᐅᑏᑦ ᐱᓯᒪᕙᑦᑐᑦ ᓯᕗᓂᕐᒧᑦ ᖃᐅᒪᓂᕐᓴᒧᑦ ᓄᓇᕕᒻᒥ ᐃᓗᓯᓕᕆᔨᒃᑯᑦ ᐱᓇᓱᐊᕈᑦᔨᕕᖓᓂᑦ, ᑫᐋᔩᑉ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᓄᑦ ᐱᓇᓱᕝᕕᖓ, ᒪᑭᕝᕕᑯᑦ ᐅᖓᓗᒃ ᐱᓇᓱᐊᕈᑦᔨᐅᑎᖓ, ᓄᓇᓕᓐᓂ ᐃᓗᓯᓕᕆᓂᕐᓄᑦ ᑲᑎᒪᔨᒃᑯᑦ ᐊᐅᒻᒥᒍᑦ ᒪᒪᕐᓴᐅᑎᖃᓗᐊᕐᑎᓯᑦᑌᓕᓂᕐᓄᑦ ᐱᓇᓱᐊᕈᑦᔨᕕᖓ, ᐊᒻᒪᓗ Fonds conjoncturel de développement (FCD) ᐊᕐᖁᑎᒋᑦᓱᒍ Ministère des Affaires municipales et de l’Occupation du territoire (MAMOT).

ᐃᓘᓐᓇᑎᒃ ᐃᑲᔪᕈᒪᓂᕐᒥᓄᑦ ᐃᑲᔪᕐᑎᐅᕙᑦᑐᑦ ᐊᒻᒪᓗ ᐱᓇᓱᐊᖃᑎᒋᔭᐅᕙᑦᑐᑦ ᐱᔪᑦᓴᐅᔮᒻᒪᕆᑉᐸᑐᑦ ᑲᔪᓯᑦᓯᐊᑎᑦᓯᒐᓱᐊᖃᑎᒌᑦᓱᑎᒃ ᑖᑦᓱᒥᖓ ᐱᓇᓱᒐᕐᒥᒃ, ᑖᓐᓇ ᐊᓕᐊᓇᕐᑎᓯᔪᖅ ᓈᒻᒪᑐᓂᒃ ᐃᓱᒪᒍᑦᔨᓂᖅ ᐱᔪᓐᓇᑎᑦᓯᓚᕿᓲᖅ ᐃᓄᑦᔪᐊᒥᒃ ᑖᑦᓱᒥᖓ ᑳᑦᑐᓂᒃ ᓂᕐᓯᐅᕈᑦᔨᕕᐅᑉ ᐃᖏᕐᕋᕈᓐᓇᓂᖓᓂᒃ.

ᓯᕆᕕᐅᑉ ᐱᓇᓱᑦᑎᖏᑦ ᐱᒐᓱᐊᑦᓯᐊᓲᑦ ᐱᓇᓱᐊᕐᐸᑕᖏᑦ ᐃᓚᖃᕐᑎᓗᒋᑦ ᐃᓚᐅᑎᑦᓯᒐᓱᐊᕐᓱᑎᒃ ᑭᓇᓕᒫᒃᑯᓂᒃ ᑲᑐᑦᔮᕆᔭᐅᑦᓯᐊᕆᐊᖃᕐᓂᖓᓄᑦ. ᓂᕿ ᐃᓄᓐᓂᒃ ᑲᑎᑎᑦᓯᒍᑕᐅᓲᒍᒻᒪᑦ ᑲᑎᒪᑎᑦᓯᒍᑕᐅᑦᓱᓂ ᐊᒻᒪᓗ ᑕᑯᓐᓇᕆᐊᒥᒃ ᐊᓕᐊᓇᒻᒪᕆᑦᓱᓂ. ᐊᕕᑦᓯᒪᑦᓯᐊᓂᖅ ᐊᔪᒉᑦᑐᒥᒃ ᓄᐃᑦᓯᒍᑕᐅᒍᓐᓇᑐᖅ ᐊᑦᑐᑕᐅᑎᑦᓯᒍᓐᓇᓱᓂᐊᓪᓛᑦ ᐆᒻᒪᑎᒃᑯᑦ; ᐃᑲᔪᓲᑦ ᐃᓱᒪᒥᑦᓱᑎᒃ ᐅᑎᑐᐃᓐᓇᐸᑦᑐᑦ ᐃᑲᔪᕆᐊᓪᓚᕈᒪᑦᓱᑎᒃ. ᐊᕕᑦᓯᐊᐸᓐᓂᖅ ᒪᒥᓴᕈᑎᐅᒻᒥᒪᑦ ᐊᒻᒪᓗ ᓄᐃᑦᓯᒍᑕᐅᒍᓐᓇᓱᓂ ᐱᑐᑦᓯᒪᐅᑎᒍᑎᑦᓯᐊᓂᒃ, ᐆᒻᒪᑎᒃᑯᑦ ᓇᓪᓕᒋᐅᑎᓂᕐᓂᒃ..ᐊᒻᒪᓗ ᓂᕿ ᑖᒃᑯᓄᖓ ᐃᓚᒋᔭᐅᓪᓚᕆᑦᓱᓂ. ᒫᑦᓯ 29, 2018: ᑐᓴᕋᑦᓴᖁᑎᖏᑦ ᑕᑯᔭᑦᓴᖑᕐᑎᑕᐅᓯᒪᔪᑦ ᑯᐯᑉ ᑲᕙᒪᖓᑕ ᓴᐳᑦᔨᐅᑎᒋᑦᓱᒋᑦ ᐃᓄᑦᔪᐊᒥ ᑳᑦᑐᓂᒃ ᓂᕐᓯᐅᕕᒻᒧᐊᖓᔪᓂᒃ ᐅᓐᓂᓯᐅᕈᑏᑦ ᖃᕆᑕᐅᔭᒃᑯᑦ ᐅᕙᓃᑦᑐᑦ http://www.fil-information.gouv.qc.ca/Pages/Article.aspx?aiguillage=ajd&lang=fr&idArticle=2603294051

ᐱᕙᓪᓕᐊᓯᒪᓂᖓ ᓄᓇᓕᓐᓂ ᑳᑦᑐᓂᒃ ᓂᕐᓯᐅᕈᑦᔨᕕᖃᕐᓂᒧᑦ ᐱᓇᓱᒐᐅᑉ ᐃᓄᑦᔪᐊᒥ: 2013-2016

ᑮᓇᐅᔭᖃᕐᑎᓯᐅᑎᓄᑦ ᐱᓯᒪᑦᓱᑎᒃ ᐱᓇᓱᑦᑎᓕᕆᕕᖓᑕ ᐊᒻᒪᓗ ᐱᑦᓯᐊᕈᓐᓇᐅᑎᓂᒃ ᐱᕙᓪᓕᐊᑎᑦᓯᕕᖓᑕ ᑳᓇᑕᐅᑉ ᓄᓇᓕᓐᓂ ᐱᒋᐊᕐᑎᓯᒍᑎᖏᓐᓂᒃ ᐱᓇᓱᐊᕈᑦᔨᐅᑎᖓᑕ ᐊᑖᓂ, ᐊᕐᖁᑎᒋᔭᐅᑎᓪᓗᒋᒃ ᒪᑭᕝᕕᑯᑦ ᐊᒻᒪᓗ ᑫᐋᔩᑉ ᐃᓅᖃᑎᒌᓂ-ᒪᑭᑕᒐᓱᐊᕐᓃᑦ ᐱᕙᓪᓕᐊᑎᑕᐅᓂᖏᓐᓄᑦ ᐱᓇᓱᐊᕈᑦᔨᐅᑎᖏᑦᑕ, ᓴᑐᕐᕖᑯᑦ ᐱᒋᐊᓕᓐᓅᙯᓯᒪᓕᕐᑐᑦ $118,500-ᓂᒃ ᐊᕐᕌᒍᓂ 3-ᓂ ᐃᑲᔪᕐᓯᒪᐅᑎᐅᑎᓪᓗᒋᑦ ᐃᓄᑦᔪᐊᒥ ᓄᓇᓕᓐᓂ ᑳᑦᑐᓂᒃ ᓂᕐᓯᐅᕈᑦᔨᕕᒻᒥᒃ – ᓯᕗᓪᓕᐸᐅᑦᓱᓂ ᐆᑦᑐᕋᐅᑎᐅᓯᒪᔪᖅ ᓂᕆᔭᑦᓭᓘᕐᑐᓂᒃ ᓂᕆᒐᑦᓴᓕᐅᕐᕕᐅᓱᓂ ᓄᓇᓕᓐᓂ.

ᐃᓄᑦᔪᐊᖅ ᐃᓚᒋᔭᐅᓯᒪᔪᖅ 3-ᓄᑦ ᓄᓇᕕᒻᒥ ᓄᓇᓕᓐᓄᑦ ᓇᓪᓕᑳᕐᑕᐅᓯᒪᔪᓄᑦ ᐃᖏᕐᕋᑎᑦᓯᕕᐅᓚᖓᑦᓱᓂ ᓄᓇᓕᓐᓂ ᓂᕐᓯᐅᕈᑦᔨᕕᒻᒧᑦ. ᐊᕐᕌᒍᓂ 3-ᓂ, ᐱᓇᓱᒐᐅᑉ ᓄᓇᓕᓐᓂ ᐊᔪᖀᒋᐊᕐᑎᖏᑦ ᐱᒐᓱᐊᒻᒪᕆᐅᑎᖃᕐᓯᒪᔪᑦ ᓈᒻᒪᑐᒥᒃ ᓂᕐᓯᐅᕈᑦᔨᕕᐅᑉ ᐃᓂᑦᓴᖓᓂᒃ, ᐱᓇᓱᑦᑎᑖᕐᑎᓯᒐᓱᐊᕐᓂᒧᓪᓗ ᐱᓇᓱᐊᕈᓯᑕᒫᑦ ᓂᕈᒥᑦᑐᓂᒃ ᓂᕆᔭᑦᓴᓕᐅᕐᑎᓂᒃ ᐊᒻᒪᓗ ᓂᕿᑦᓴᔭᓕᐅᕐᑎᓂᒃ, ᐃᓄᑦᑕᓯᕐᑐᐃᒋᐊᖃᕐᓯᒪᑦᓱᑎᓪᓗ ᐃᑲᔪᕈᒪᒧᑦ ᐃᓱᒪᒥᑦᓱᑎᒃ ᓂᕐᓯᐅᕕᒻᒥ ᐃᑲᔪᕐᑎᓴᓂᒃ ᐊᒻᒪᓗ ᐸᔪᑦᑎᓴᓂᒃ ᐃᓄᑐᙯᑦ ᓂᕆᔭᑦᓴᖏᓐᓂᒃ, ᐊᒻᒪᓗ ᓄᓇᓕᒥᐅᓂᒃ ᑭᖕᖒᒪᔦᑦ ᐃᑉᐱᒋᓗᒋᑦ ᐃᑲᔪᕐᑎᒌᒍᑎᖃᕐᓂᓂᒃ.

ᓯᕗᓪᓕᐸᑦᔭᐅᒋᐊᓕᓐᓂᒃ ᑭᒡᒐᑐᕈᖃᕐᓂᖅ ᐱᓇᓱᐊᕈᓯᑕᒫᑦ ᐆᓇᕐᑐᓂᒃ ᓂᕐᓯᐅᕈᑦᔨᒋᐊᖃᕐᓂᒧᑦ ᐃᓕᒃᑰᑎᕐᑐᓂᒃ ᓂᕐᓯᑕᐅᑦᑕᓱᑎᒃ, ᕿᑐᕐᖓᒥᓂᒃ ᐃᓄᑑᑦᔨᔪᓂᒃ, ᐊᒻᒪᓗ ᐃᓄᑐᖃᕐᓂᒃ. ᑭᒡᒐᑐᕈᑎᒋᐊᓪᓚᒃ, ᐃᑉᐱᒋᑦᓱᒋᑦ ᐊᔪᕐᓴᓗᐊᕐᐸᑐᑦ, ᓂᕆᔭᑦᓴᓕᐅᕐᑕᐅᕙᒋᐊᖃᕐᑎᓗᒋᑦ ᐃᓚᒌᓄᑦ ᓈᒻᒪᑐᓂᒃ ᖁᐊᒍᑎᓪᓗᒋᑦ ᓂᕆᔭᑦᓴᖃᖕᖏᑐᑦ ᐁᑦᓯᒍᓐᓇᕕᖃᕐᑎᓱᒋᑦ ᐅᐃᒪᓇᕐᑐᖃᐅᑎᖃᕐᓗᑎᒃ ᐃᓅᓯᓕᕆᔩᑦ ᐸᔪᑉᐸᑎᓗᒋᑦ ᑳᓗᐊᕐᑐᓂᒃ. ᐱᓇᓱᒐᖅ ᐊᓯᑦᔨᑐᕐᑕᐅᕙᓪᓕᐊᓯᒪᔪᖅ ᐱᓇᓱᐊᖃᑎᒌᓄᑦ ᐃᑲᔪᕐᑎᓄᑦ ᓄᓇᓖᑦ ᐃᓗᐊᓂ – ᐃᓚᐅᕙᑦᑎᓗᒍ ᐃᓚᒌᑦ ᐃᓪᓗᖁᑎᖓ, ᐱᓇᓱᑦᑎᓴᓂᒃ ᐃᓕᓐᓂᐊᑎᑦᓯᕕᒃ, ᓄᓇᓕᓐᓂ ᐃᓗᓯᓕᕆᓂᕐᓂ ᐊᒻᒪᓗ ᐃᓅᓯᓕᕆᓂᕐᓂ ᐱᓇᓱᑦᑏᑦ.

ᐊᕐᕌᒍᓂ 3-ᓂ, 3,600 ᐅᖓᑖᓅᕐᑐᑦ ᒪᓂᔭᐅᓯᒪᔪᑦ ᓂᕆᓚᖓᔭᖏᑦ ᐃᓕᒃᑰᑎᕐᑐᑦ ᐊᒻᒪᓗ ᐃᓚᒌᑦ ᓂᕆᔭᑦᓴᖃᖕᖏᑐᑦ, ᐊᒥᓱᓪᓚᕇᓪᓗ ᐃᓇᓘᔦᑦ ᓂᕿᑦᓴᔦᑦ ᐸᔪᒍᑕᐅᓯᒪᓕᕐᓱᑎᒃ ᐃᓄᑐᖃᕐᓄᑦ, ᐊᒻᒪᓗ ᑭᑎᑦᓴᐅᖏᑦᑐᑦ ᐃᑲᔪᕈᒪᓂᕐᒥᓄᑦ ᐃᑲᔪᕐᓯᒪᓕᕐᓱᑎᒃ (ᑖᒃᑯᐊ ᐅᓄᕐᓂᓴᖏᑦ ᐱᓯᒪᔪᑦ ᐱᓇᓱᒐᑦᓴᓄᑦ ᐃᓕᕙᓪᓕᐊᒐᓱᐊᕐᑐᓂᑦ ᐊᒻᒪᓗ ᐊᕐᓀᑦ ᐅᕕᒃᑫᑦ ᐊᓇᕐᕌᐱᖓᓂᑦ) ᐱᔭᑦᓴᓯᐅᕐᕕᐅᓯᒪᔪᑦ ᐊᒻᒪᓗ ᐱᓇᓱᒐᕐᒥᒃ ᑲᒪᖃᑕᐅᑦᓯᐊᕈᓐᓇᓯᓯᒪᑦᓱᑎᒃ. ᓄᑕᐅᓪᓕᑎᕐᓯᒪᔪᖅ ᓅᒍᓐᓇᑐᑦᓴᔭᖅ ᐃᓪᓗᐊᐱᒃ ᓄᓇᓖᑦ ᐁᑦᑑᑎᒋᓯᒪᔭᖓ ᐅᓪᓗᒥ ᐱᓇᓱᒐᕐᒧᑦ ᐃᓂᒋᔭᐅᓪᓚᕆᓕᕐᑐᖅ, ᐊᒻᒪᓗ ᐱᓇᓱᒐᖅ ᖃᐅᔨᓴᕐᑕᐅᒪᕆᑦᑎᓗᒍ ᐱᑦᓯᐊᒪᕆᓐᓂᖓ ᓇᓗᓀᕐᑕᐅᓯᒪᓕᕐᓱᓂ ᐃᓕᖓᔪᓄᑦ ᓂᕿᑦᓯᐊᑑᒪᑎᑦᓯᓂᕐᓄᑦ ᐊᒻᒪᓗ ᐊᑭᑐᓗᐊᖕᖏᑐᓂᒃ ᓂᕆᔭᑦᓴᓂᒃ ᓄᐃᑎᕆᑦᓯᐊᕈᓐᓇᓂᕐᒧᑦ.

ᑐᖓᓕᐊ ᐱᓇᓱᐊᕋᑦᓴᐅᓕᕆᕗᖅ ᐆᑦᑐᕋᐅᑎᐅᑦᓱᓂ ᐱᓇᓱᐊᒐᕐᑖᒍᓯᒪᔪᖅ ᓄᓇᓕᓐᓂ ᐆᒪᒐᓱᐊᕈᑎᑦᓴᓂᒃ ᐃᑲᔫᕐᕕᐅᓚᖓᑎᓪᓗᒍ ᓄᐃᑕᐅᓯᒪᔪᖅ ᑲᔪᓯᒍᓐᓇᐅᑎᑖᕐᑕᐅᒋᐊᓚᖓᓂᖓ ᓯᕗᓂᕐᒥ.

Pin It on Pinterest

ᐊᐅᓚᓯᒪᔭᕗᑦ ᓄᓇᓕᓐᓂ ᐱᓇᓱᒉᑦ ᐃᓄᑦᔪᐊᒥ ᑳᑦᑐᓂᒃ ᓂᕆᑎᑦᓯᓂᕐᒧᑦ ᐱᓇᓱᒐᖅ